អគ្គលេខាធិការនៃអង្គការសហប្រជាជាតិ លោក Antonio Guterres ព្រមានថា រុស្ស៊ី កំពុងតែ «បង្កើនគ្រោះថ្នាក់» ដោយការរឹបអូសទឹកដីរបស់ អ៊ុយក្រែន រំលោភលើធម្មនុញ្ញនៃអង្គការសហប្រជាជាតិ។
«ធម្មនុញ្ញនៃអង្គការសហប្រជាជាតិ លើកឡើងច្បាស់ថា រាល់ការច្របាច់បញ្ចូលទឹកដីរបស់ប្រទេសមួយ ទៅក្នុងប្រទេសមួយទៀត បើសិនជាលទ្ធផលនៃការគំរាមកំហែង ឬប្រើប្រាស់កម្លាំងបាយ នោះនឹងជាសកម្មភាពរំលោភគោលការណ៍ច្បាប់របស់ ធម្មនុញ្ញអង្គការសហប្រជាជាតិ និងច្បាប់អន្តរជាតិ» អគ្គលេខាធិការនៃអង្គការសហប្រជាជាតិ លោក Antonio Guterres កាលពីថ្ងៃទី ២៩ កញ្ញា បានថ្លែងនៅក្នុងសន្និសីទសារព័ត៌មាននៅឯទីស្នាក់ការកណ្ដាលនៅ New York សហរដ្ឋអាម៉េរិក។
លោក Antonio Guterres បញ្ជាក់ជាថ្មីថា ផែនការច្របាច់ទឹកដីរបស់ អ៊ុយក្រែន ទៅក្នុងទឹកដីរបស់ រុស្ស៊ី គឺជាសកម្មភាព «មិនសមស្របទៅនឹងក្របខណ្ឌនៃច្បាប់អន្តរជាតិ» និងដើរផ្ទុយពីតម្លៃរបស់សហគមន៍អន្តរជាតិ។
អង្គការសហប្រជាជាតិ កាលពីថ្ងៃទី ២៧ កញ្ញា បានសន្មតថា ការបោះឆ្នោតប្រជាមតិកន្លងមកនៅក្នុង ៤ តំបន់ដែល រុស្ស៊ី កំពុងគ្រប់គ្រងនៅលើទឹកដី របស់ អ៊ុយក្រែន គឺជាទង្វើខុសច្បាប់។
អគ្គលេខាធិការនៃអង្គការសហប្រជាជាតិ លោក Antonio Guterres បន្ថែមថា «ទង្វើនេះគឺជាការប្រមាថចំពោះគោលដៅ និងគោលការណ៍របស់ អង្គការសហប្រជាជាតិ។ នេះគឺជាជំហានដែលបង្កភាពតានតឹងដ៏គ្រោះថ្នាក់។ វាមិនអាចមានវត្តមាននៅក្នុងពិភពលោកសម័យថ្មី ហើយយើងមិនអាចទទួលយកបាន»។
តាមរយៈការរឹបអូសតំបន់ Donetsk, Lugansk, Kherson និង Zaporizhzhia រុស្ស៊ី កំពុងតែគំរាមកំហែងដល់ក្ដីរំពឹងអំពីសន្តិភាព នេះបើតាមលោក Antonio Guterres។ លោកបន្ថែមថា មូស្គូ នឹងអូសបន្លាយផលប៉ះពាល់ធ្ងន់ធ្ងន់ដល់សេដ្ឋកិច្ចសកល ពិសេសគឺបណ្ដាប្រទេសកំពុងអភិវឌ្ឍ ទន្ទឹមនឹងការរារាំងសកម្មភាពជំនួយមនុស្សធម៌នៅ អ៊ុយក្រែន និងតំបន់ជាច្រើនផ្សេងទៀត។
ប្រតិភូរបស់ រុស្ស៊ី ប្រចាំ អង្គការសហប្រជាជាតិ ក្រោយមកក៏បានជំទាស់នឹងសាររបស់លោក Antonio Guterres ដោយបានលើកឡើងថា សម្ដីរបស់ អគ្គលេខាធិការនៃអង្គការសហប្រជាជាតិ មានភាពលម្អៀងទៅរកលោកខាងលិច៕