សារព័ត៌មានរុស្ស៊ី បានព្រមានថា អ្នកទាំងឡាយណាដែលធ្វើបាតុកម្មប្រឆាំងការសម្រេចចិត្តរបស់ ប្រធានាធិបតី ពូទីន ស្ដីពីការកេណ្ឌទ័ពទៅធ្វើសង្គ្រាមនៅ អ៊ុយក្រែន នឹងត្រូវចាប់បញ្ចូលទៅក្នុងជួរកងទ័ព។
បាតុកម្មនានាបានកើតមានឡើងនៅពាសពេញទឹកដីរុស្ស៊ី កាលពីព្រលប់ថ្ងៃពុធ ដើម្បីប្រឆាំងនឹងបទបញ្ជា របស់លោក ពូទីន ស្ដីពីការកែនទ័ពមួយផ្នែករបស់ រុស្ស៊ី ដើម្បីទៅធ្វើសង្គ្រាមនៅ អ៊ុយក្រែន។
ទីភ្នាក់ងារសារព័ត៌មាននានារបស់ រុស្ស៊ី បានព្រមានថា អ្នកទាំងឡាយណាដែលចូលរួមធ្វើ «បាតុកម្មខុសច្បាប់» នឹងត្រូវចាប់យកទៅធ្វើទាហាន នេះបើតាម Samuel Ramani សហការីម្នាក់នៅ វិទ្យាស្ថានស្រាវជ្រាវផ្នែកការពារជាតិ និងសន្តិសុខ របស់ ចក្រភពអង់គ្លេស។
មន្ត្រីផ្នែកសារព័ត៌មានជាន់ខ្ពស់ម្នាក់របស់ វិមានក្រឹមឡាំង Vladimir Solovyov បានចែករំលែកអត្ថបទផ្សាយលើទំព័រ Telegram ស្ដីពីវិធានការនានាដើម្បីចាត់ការក្រុមបាតុករ។ លោក Vladimir Solovyov សរសេរថា «ពួកគេ (ប៉ូលិស) នឹងពិនិត្យលិខិតស្នាមនៅនឹងកន្លែង ដើម្បីកំណត់អត្តសញ្ញាណ ចាប់ខ្លួន និងបញ្ជូនទៅកាន់ស្ថាប័នផ្ទៃក្នុង»។
ក្រោយមក នឹងមានការចាត់ជាប្រភេទនៃការចូលបម្រើកងទ័ព។ អ្នកដែលមិនមានលក្ខខណ្ឌសមស្របពេលនេះ នឹងត្រូវបញ្ចូលទៅក្នុងជួរកងទ័ពលើកបន្ទាប់ នេះបើតាមលោក Vladimir Solovyov។
