បុរសម្នាក់ត្រូវបានប៉ូលិសហុងកុងចាប់ខ្លួន ដោយសារតែបានប្រើប្រាស់ឧបករណ៍ភ្លេងអាម៉ូនីកា លេងបទគោរពទង់ជាតិអង់គ្លេស និងបទ «ជូនពរសេរីសួស្ដីដល់ហុងកុង»។
កាលពីថ្ងៃទី ១៩ កញ្ញា ចក្រភពអង់គ្លេស បានប្រារព្ធព្រះរាជពិធីបញ្ចុះព្រះសពអតីតមហាក្សត្រី Elizabeth ទី ២ ដោយមានការចូលរួមពីឥស្សរជននយោបាយ និងក្សត្រា ក្សត្រី ប្រមាណ ៥០០ រូប មកពីបណ្ដាប្រទេសក្នុងពិភពលោក។ នៅ ហុងកុង នៅពេលមេឃងងឹត ខាងក្រៅស្ថានទូតអង់គ្លេស ក៏នៅមានមនុស្សម្នាមកគោរពវិញ្ញាណក្ខន្ធរបស់ អតីតមហាក្សត្រីអង់គ្លេស។
នៅក្នុងអំឡុងពេលខាងលើ បុរសម្នាក់ដែលត្រូវបានគេជឿថា កំពុងប្រើប្រាស់ឧបករណ៍ភ្លេងអាម៉ូនីកា ផ្លុំបទភ្លេងមួយចំនួនដូចជា បទគោរពទង់ជាតិអង់គ្លេស និងបទ “Glory to Hong Kong” (ជូនពរសេរីសួស្ដីដល់ហុងកុង) ដែលជាបទភ្លេងបាតុកម្មនៅទីក្រុងនេះជាដើម ត្រូវបានចាប់ខ្លួន។
ប៉ូលិសហុងកុង បានឱ្យដឹងថា នៅវេលាម៉ោង ៩ កន្លះ បុរសរស់នៅក្នុងតំបន់ម្នាក់ អាយុ ៤៣ ឆ្នាំ ត្រូវបានចាប់ខ្លួននៅក្បែរផ្លូវតុលាការលេខ ១ ដោយត្រូវបានចោទថា ធ្វើសកម្មភាពញុះញង់ រំលោភលើមាត្រាទី ៩ នៃក្រមព្រហ្មទណ្ឌរបស់ ហុងកុង។ បច្ចុប្បន្ន បុរសនេះកំពុងត្រូវបានឃុំខ្លួនបណ្ដោះអាសន្នដើម្បីធ្វើការស៊ើបអង្កេត។
