ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចេញបទបញ្ជាកេណ្ឌទ័ពជាលើកដំបូងរបស់ប្រទេសនេះ រាប់ចាប់ពីសង្គ្រាមលោកលើកទី ២ នាំឱ្យមានបាតុកម្មប្រឆាំងកើតឡើង។
បាតុករជាង ១,៣០០ នាក់ ដែលចូលរួមធ្វើបាតុកម្មប្រឆាំងបទបញ្ជាកែនទ័ពមួយផ្នែកដើម្បីបញ្ជូនទៅធ្វើសង្គ្រាមនៅ អ៊ុយក្រែន របស់លោក ពូទីន ត្រូវបានចាប់ខ្លួននៅក្នុងបាតុកម្មជាច្រើននៅពាសពេញទឹកដីរុស្ស៊ី។
អង្គការឃ្លាំមើល OVD-Info បានរកឃើញថា មនុស្សយ៉ាងតិច ១,៣៣២ នាក់ ត្រូវបានចាប់ខ្លួនក្នុងបាតុកម្មនានានៅក្នុង ៣៨ ទីក្រុង របស់ រុស្ស៊ី ក្រោយពីសេចក្ដីថ្លែងការណ៍របស់លោក ពូទីន កាលពីម្សិលមិញ។
នេះគឺជាបាតុកម្មធំបំផុតនៅ រុស្ស៊ី រាប់ចាប់តាំងពីមានបាតុកម្មប្រឆាំងនឹងយុទ្ធនាការយោធាពិសេសរបស់លោក ពូទីន នៅ អ៊ុយក្រែន កាលពីខែកុម្ភៈ។
បាតុកម្មថ្មីនេះត្រូវបានធ្វើឡើងក្រោយពី ចលនាប្រជាធិបតេយ្យយុវជន Vesna ដែលជាចលនាប្រឆាំងសង្គ្រាម បានអំពាវនាវឱ្យធ្វើបាតុកម្មទូទាំងប្រទេសរុស្ស៊ី ដើម្បីជំទាស់នឹងបទបញ្ជាប្រមូលទ័ពរបស់លោក ពូទីន។