ប៉ូលិសថៃ បានឱ្យដឹងថា ខ្មាន់កាំភ្លើងម្នាក់បានស្លាប់ និងមនុស្ស ២ នាក់ទៀតរងរបួស នៅក្នុងករណីផ្ទុះអាវុធនៅមូលដ្ឋានទ័ពក្នុង រាជធានីបាងកក នាថ្ងៃទី ១៤ កញ្ញានេះ។
អ្នកនាំពាក្យរងរបស់ប៉ូលិសថៃ លោក Kissana Phathanacharoen និយាយថា ជនសង្ស័យត្រូវបានចាប់ខ្លួន ក្រោយពីហេតុការណ៍ផ្ទុះអាវុធមួយបានកើតឡើងនៅសាលា Army War College នៃបញ្ជាការហ្វឹកហ្វឺនកងទ័ព ដែលជាផ្នែកមួយក្នុងបណ្ដុំអគារកងទ័ពនៅភាគខាងជើងនៃ រាជធានីបាងកក នេះបើតាម AFP។
«ករណីផ្ទុះអាវុធបានសម្លាប់មនុស្សម្នាក់ និង ២ នាក់ទៀតរងរបួស ប៉ូលិសក្នុងតំបន់បានគ្រប់គ្រងស្ថានការណ៍។ យើងបានចាប់ខ្លួនជងសង្ស័យម្នាក់» លោក Kissana Phathanacharoen ប្រាប់ AFP ដូច្នេះ។
Bangkok Post ឱ្យដឹងថា អ្នកនាំពាក្យម្នាក់និយាយថា មន្ត្រីទាហានម្នាក់ដែលមានជំងឺផ្លូវចិត្ត បានសម្លាប់មនុស្សម្នាក់ និងបង្ករបួសស្នាមដល់មនុស្សម្នាក់ទៀត ព្រមទាំងគំរាមសម្លាប់មនុស្ស ១០ នាក់។
![](https://i0.wp.com/www.lareine.com.kh/wp-content/uploads/2022/09/lareine.com.kh-2022-09-14_13-50-00_929808.jpg?resize=696%2C437&ssl=1)
យោងតាម Bangkok Post ជនសង្ស័យឈ្មោះ Yongyut Mangkornkim អាយុ ៥៩ ឆ្នាំ ត្រូវបានប៉ូលិសចាប់ខ្លួន។ ក៏ប៉ុន្តែ មូលហេតុនៃករណីផ្ទុះអាវុធនេះ មិនទាន់ត្រូវបានដឹងច្បាស់នៅឡើយ។