បន្ទាប់ពី មហាក្សត្រីអង់គ្លេស Elizabeth II បានយាងចូលទិវង្គតក្រោយការគ្រងរាជបាន ៧០ ឆ្នាំ មហាក្សត្រីរបស់ ប្រទេសដាណឺម៉ាក Margrethe II ក៏បានក្លាយជាស្ដេចដែលកំពុងគ្រងរាជសម្បត្តិយូរជាងគេនៅ អឺរ៉ុប ដោយឡើងសោយរាជបាន ៥០ ឆ្នាំ។ មហាក្សត្រី Margrethe II ក៏ត្រូវជាអនុជអយ្យិកាមួយ (ប្អូនស្រីជីដូនមួយ) របស់ អតីតមហាក្សត្រីអង់គ្លេស Elizabeth II។
កាលពីខែមករា ឆ្នាំ ២០២២ ប្រទេសដាណឺម៉ាក គ្រោងនឹងប្រារព្ធពិធីគម្រប់ខួប ៥០ ឆ្នាំ នៃថ្ងៃឡើងគ្រងរាជរបស់ មហាក្សត្រី Margrethe II ប៉ុន្តែ ដោយសារកូវីដ-១៩ ព្រឹត្តិការណ៍នេះក៏ត្រូវបានពន្យារពេល។
ពិធីគម្រប់ខួប ៥០ ឆ្នាំនៃការឡើងសោយរាជរបស់ មហាក្សត្រី Margrethe II ត្រូវបានគ្រោងធ្វើឡើងនៅចុងសប្ដាហ៍នេះ ប៉ុន្តែ ជាថ្មីម្ដងទៀត ពិធីនេះក៏ត្រូវរងផលប៉ះពាល់ពីការសោយទិវង្គតរបស់ មហាក្សត្រីអង់គ្លេស Elizabeth II (០៨ កញ្ញា ២០២២)។ សារព័ត៌មានដាណឺម៉ាក បានឱ្យដឹងថា ពិធីនេះត្រូវបានសម្រួលដោយមហាក្សត្រី Margrethe II ផ្ទាល់ ដើម្បីសម្ដែងការគោរពចំពោះ អតីតមហាក្សត្រីអង់គ្លេស Elizabeth II ដែលត្រូវជាព្រះរៀមអយ្យិកាមួយ (បងស្រីជីដូនមួយ) របស់ទ្រង់។
មហាក្សត្រី Margrethe II បច្ចុប្បន្នមានព្រះជន្ម ៨២ វស្សា។ ទ្រង់បានឡើងគ្រងរាជកាលពីឆ្នាំ ១៩៧២ ក្នុងព្រះជន្ម ៣១ វស្សា។ កាលពីទើបឡើងគ្រងរាជសម្បត្តិ នៅ ដាណឺម៉ាក មានពលរដ្ឋតែ ៤៥% ប៉ុណ្ណោះដែលគាំទ្រឱ្យមានរបបរាជានិយម។ ប៉ុន្តែ មកដល់បច្ចុប្បន្ន តួលេខនេះបានឡើងដល់ជាង ៨០%។
ជោគជ័យខាងលើគឺកើតឡើងដោយសារការប្រឹងប្រែងក្នុងការធ្វើទំនើបកម្មរបបរាជានិយម ក្នុងនោះមានទាំងការលើកទឹកចិត្តដល់បុត្រារបស់មហាក្សត្រី រៀបអភិសេកជាមួយពលរដ្ឋសាមញ្ញដែលមិនស្ថិតក្នុងខ្សែរាជវង្ស ឬត្រកូលខ្ពង់ខ្ពស់។
ក្រៅពីនេះ មហាក្សត្រី Margrethe II ក៏ត្រូវបានវាយតម្លៃថាជាវិចិត្រករជំនាញ ធ្លាប់គូររូបតំណាងដាក់លើសៀវភៅ និងស្នាដៃសិល្បៈជាច្រើនដែលត្រូវបានដាក់តាំងក្នុងសារមន្ទីរនានា នៅក្នុង និងក្រៅប្រទេស។ ទ្រង់ក៏ធ្លាប់ធ្វើការជាអ្នករចនាម៉ូដសម្លៀកបំពាក់ និងគ្រឿងតុបតែងសម្រាប់សាលមហោស្រពបាឡេរាជវង្សដាណឺម៉ាកជាដើម។ល។
ក្នុងនាមជាភាសាវិទូមួយអង្គ មហាក្សត្រី Margrethe II របស់ ដាណឺម៉ាក ក៏ធ្លាប់បានយាងចូលរួមក្នុងគម្រោងបកប្រែភាសាផងដែរ៕
