ពលរដ្ឋអាម៉េរិក រម្លឹកឈ្មោះជនរងគ្រោះ ធ្វើកិច្ចការមនុស្សធម៌ និងចូលរួមព្រឹត្តិការណ៍នានាដើម្បីជាការរម្លឹកខួបទី ២១ ឆ្នាំ នៃហេតុការណ៍ភេរវកម្ម ១១ កញ្ញា ឆ្នាំ ២០០១ ដែលបានបណ្ដាលឱ្យមនុស្សជិត ៣,០០០ នាក់ត្រូវបាត់បង់ជីវិត។
ពិធីរម្លឹកខួប ២១ ឆ្នាំនៃព្រឹត្តិការណ៍ ១១ កញ្ញា ត្រូវបានធ្វើឡើងនៅក្នុងតំបន់ដែលអគារភ្លោះរបស់មជ្ឈមណ្ឌលពាណិជ្ជកម្មពិភពលោក ក្នុងទីក្រុងញូវយ៉ក សហរដ្ឋអាម៉េរិក បានដួលរលំនៅក្នុងហេតុការណ៍វាយប្រហារភេរវកម្មកាលពីឆ្នាំ ២០០១ (២១ ឆ្នាំមុន)។ សាច់ញាតិរបស់ជនរងគ្រោះ និងក្រុមមន្ត្រីអាម៉េរិក ក៏បានចូលរួមព្រឹត្តិការណ៍រម្លឹកខួបដ៏សោកសៅនេះនៅទីកន្លែង ២ ទៀត គឺ មន្ទីរបញ្ចកោណ និងវាលស្រែនៅក្នុងរដ្ឋ Pennsylvania។
សហគមន៍នានានៅពាសពេញទឹកដីអាម៉េរិក បានរម្លឹកខួបព្រឹត្តិការណ៍ ១១ កញ្ញា ទៅតាមរូបភាពផ្សេងៗ មានដូចជា ពិធីបួងសួងក្រោមពន្លឺភ្លើងទៀន ពិធីសាសនានានា និងសកម្មភាពរម្លឹកខួបផ្សេងៗទៀត។ល។
កាលពីជាង ២ ទសវត្សរ៍មុន ហេតុការណ៍វាយប្រហារភេរវកម្ម ១១ កញ្ញា បានក្លាយជាព្រឹត្តិការណ៍ដែលនាំឱ្យ សហរដ្ឋអាម៉េរិក ត្រូវស្ដារគោលនយោបាយសន្តិសុខជាតិ និងចាប់ផ្ដើម «សង្គ្រាមប្រឆាំងភេរវកម្ម» នៅទូទាំងពិភពលោក។
នៅមុនថ្ងៃរម្លឹកខួបនៃព្រឹត្តិការណ៍ ១១ កញ្ញា នៅក្នុងឆ្នាំនេះ កងទ័ពអាម៉េរិក បានបញ្ជូនយន្តហោះគ្មានមនុស្សបើក (UAV) ទៅប្រហារ Ayman al-Zawahri ដែលជាសមាជិកសំខាន់មួយរូបរបស់ក្រុមភេរវករ al-Qaeda និងជាអ្នកដែលជាប់ទាក់ទិននឹងហេតុការណ៍ ១១ កញ្ញា។
ករណី ១១ កញ្ញា បាននាំឱ្យ ប្រជាជនអាម៉េរិក សាមគ្គីគ្នាក្នុងមួយរយៈពេល ប៉ុន្តែក៏បានបណ្ដាលឱ្យសហគមន៍អ៊ីស្លាមសាសនិកនៅប្រទេសនេះ រងការសង្ស័យ និងការរើសអើងអស់ជាច្រើនឆ្នាំ។
ព្រឹត្តិការណ៍ ១១ កញ្ញា ក៏ត្រូវបានគេអះអាងថា បាន និងកំពុងជះឥទ្ធិពលអាក្រក់ក្នុងសង្គមអាម៉េរិក ទាំងក្នុងវិស័យនយោបាយ ទាំងក្នុងជីវភាពរស់នៅប្រចាំថ្ងៃរបស់ប្រជាជន រហូតដល់បច្ចុប្បន្ន៕
