អាជ្ញាធរទីក្រុងប៉ារីស ទើបតែបានចេញសម្រេចមួយដែលតម្រូវឱ្យម្ចាស់ម៉ូតូប្រើសាំងនៅក្នុងរដ្ឋធានីរបស់ បារាំង បង់ថ្លៃចត ខណៈដែលម៉ូតូអគ្គិសនីនៅតែត្រូវបានអនុញ្ញាតឱ្យប្រើប្រាស់ចំណតដោយមិនគិតថ្លៃ។
ការយកថ្លៃចតម៉ូតូថ្មីនេះ គឺអនុវត្តទៅតាមការសន្យាដែលបានធ្វើឡើងក្នុងការឃោសនាបោះឆ្នោតរបស់ អភិបាលក្រុងប៉ារីស លោកស្រី Anne Hidalgo ហើយបើតាមគ្រោង បទបញ្ជានេះនឹងចាប់ផ្ដើមអនុវត្តពីខែមករាឆ្នាំនេះ។ ក៏ប៉ុន្តែ ការអនុវត្តបទបញ្ជាត្រូវបានពន្យារពេល នៅពេលលោកស្រី Anne Hidalgo ក្លាយជាបេក្ខភាពប្រធានាធិបតីបារាំង។
ក្នុងប៉ុន្មានឆ្នាំចុងក្រោយនេះ អភិបាលរដ្ឋធានី Hidalgo បានឱ្យសាងសង់បណ្ដាញគន្លងផ្លូវថ្មីសម្រាប់កង់ និងដំឡើងថ្លៃចតរថយន្ត ដើម្បីដឹកនាំប្រជាជននៅ ប៉ារីស ងាកទៅរកមធ្យោបាយធ្វើដំណើរដែលល្អសម្រាប់បរិស្ថាន។ ក្រុមតំណាងឱ្យអ្នកជិះកង់ និងអ្នកដើរដោយថ្មើរជើង បានសម្ដែងការសាទរចំពោះបទបញ្ជានេះ។
ទោះជាយ៉ាងណាក៏ដោយ សមាគមអ្នកជិះម៉ូតូ និងក្រុមប្រឆាំងនៅ ប៉ារីស បានជំទាស់យ៉ាងខ្លាំងក្លាចំពោះគោលនយោបាយខាងលើ និងបានហៅវាថាជាប្រភេទពន្ធថ្មី ហើយថា វានឹងមិនជួយកាត់បន្ថយការកកស្ទះចរាចរណ៍ឡើយ។
ចាប់ពីថ្ងៃទី ០១ កញ្ញា ថ្លៃចតម៉ូតូនៅតំបន់កណ្ដាលក្រុងគឺ ៣ អឺរ៉ូ សម្រាប់ការចត ១ ម៉ោង។ សម្រាប់ការចតនៅក្នុងតំបន់ជាយក្រុងវិញគឺតម្រូវឱ្យបង់ថ្លៃ ២ អឺរ៉ូ សម្រាប់ ១ ម៉ោង។ ពលរដ្ឋប៉ារីស ក៏អាចទិញបណ្ណចតម៉ូតូប្រចាំឆ្នាំក្នុងតម្លៃ ២២.៥០ អឺរ៉ូ/ឆ្នាំ ដើម្បីសំច័យប្រាក់៕