នៅក្នុងកិច្ចប្រជុំសំខាន់មួយរបស់ សភាកូរ៉េខាងជើង មេដឹកនាំ គីម ជុងអុន បានប្រកាសថា ប្រទេសរបស់លោកនឹងមិនបោះបង់ចោលអាវុធនុយក្លេអែរជាដាច់ខាត។
ការអះអាងខាងលើរបស់ មេដឹកនាំកូរ៉េខាងជើង ត្រូវបានធ្វើឡើងនៅក្នុងកិច្ចប្រជុំសំខាន់របស់ សភាកូរ៉េខាងជើង នាសប្ដាហ៍នេះ។ នេះបើតាម ទីភ្នាក់ងារសារព័ត៌មានរដ្ឋកូរ៉េខាងជើង KCNA ចុះផ្សាក្នុងថ្ងៃទី ០៩ កញ្ញា។
លោក គីម ជុងអុន យល់ថា គោលដៅរបស់ សហរដ្ឋអាម៉េរិក គឺការផ្ដួលរំលំរបបនៅ កូរ៉េខាងជើង។ មេដឹកនាំរបស់ កូរ៉េខាងជើង អះអាងថា អាម៉េរិក សង្ឃឹមថា នឹងដាក់សម្ពាធ បង្ខំឱ្យ កូរ៉េខាងជើង បោះបង់អាវុធនុយក្លេអែរ តាមរយៈទណ្ឌកម្មធ្ងន់ធ្ងរ ប៉ុន្តែ លោក គីម បញ្ជាក់ថា កូរ៉េខាងជើង នឹងមិនចុះចាញ់ សូម្បីតែក្រោយពីទណ្ឌកម្មលើ កូរ៉េខាងជើង ត្រូវបានអនុវត្តក្នុងរយៈពេល «រាប់រយឆ្នាំ»។
មេដឹកនាំកូរ៉េខាងជើង ប្រកាសថា គោលនយោបាយប្រើប្រាស់កម្លាំងអាវុធនុយក្លេអែរ ត្រូវបានកត់ត្រានៅក្នុងច្បាប់របស់ប្រទេសនេះ។
លោក គីម ជុងអុន ឱ្យដឹងថា ច្បាប់ថ្មីនេះអនុញ្ញាតឱ្យ កូរ៉េខាងជើង «ម្ចាស់ការ» ក្នុងការឆ្លើយតបដោយអាវុធនុយក្លេអែរ បើសិនជាត្រូវរងការវាយប្រហារ៕