(ហ្គីណេ)-ម៉ូតូមួយគ្រឿងព្យាយាមបរឆ្លងផ្លូវរត់របស់យន្តហោះ ក្នុងពេលដែលយន្តហោះ A320neo របស់ក្រុមហ៊ុន TAP Air កំពុងចុះចត បណ្ដាលឱ្យមនុស្ស ២ នាក់នៅលើម៉ូតូត្រូវបាត់បង់ជីវិត។
ហេតុការណ៍នេះបានកើតឡើងនៅពេលយន្តហោះ Airbus A320neo របស់ក្រុមហ៊ុនអាកាសចរណ៍ TAP Air របស់ ព័រទុយហ្គាល កំពុងចុះចតនៅលើព្រលានយន្តហោះអន្តរជាតិ Ahmed Sekou Toure នៅ រដ្ឋធានីកូណាគ្រី ប្រទេសហ្គីណេ កាលពីយប់ថ្ងៃទី ០២ កញ្ញា ប៉ុន្តែ ព័ត៌មាននេះទើបតែត្រូវបានអាជ្ញាធរប្រកាសកាលពីថ្ងៃទី ០៤ កញ្ញា។
អាជ្ញាធរហ្គីណេ បានឱ្យដឹងថា ម៉ូតូមួយគ្រឿង មុនពេលជួបគ្រោះថ្នាក់ បានព្យាយាមបរឆ្លងកាត់ផ្លូវរត់របស់យន្តហោះ នៅពេលយន្តហោះកំពុងបន្ថយល្បឿន ចុះចត ហើយក៏បានប៉ះទង្គិចទៅនឹងម៉ាស៊ីននៅស្លាបខាងស្ដាំរបស់យន្តហោះ។ មនុស្ស ២ នាក់ដែលជិះលើម៉ូតូនោះបានបាត់បង់ជីវិត ក្នុងនោះ ជនរងគ្រោះម្នាក់ត្រូវបានគេជឿថា ជាមន្ត្រីនៅអាកាសយានដ្ឋាន។
ម៉ាស៊ីនរបស់យន្តហោះ A320neo ត្រូវរងការខូចខាតធ្ងន់ធ្ងរ ប៉ុន្តែ មិនមានការផ្ទុះឆេះ ហើយក៏មិនបង្កឱ្យមានអ្នកណាម្នាក់លើយន្តហោះ រងរបួសនោះដែរ។ ហេតុការណ៍នេះនាំឱ្យយន្តហោះត្រូវលុបចោលជើងហោះហើរបន្ទាប់ដែលគ្រោងនឹងធ្វើដំណើរទៅកាន់ ព័រទុយហ្គាល។ បច្ចុប្បន្ន យន្តហោះនេះកំពុងស្ថិតនៅក្នុង រដ្ឋធានីកូណាគ្រី។
អាជ្ញាធរគ្រប់គ្រងអាកាសយានដ្ឋានរបស់ ហ្គីណេ បានប្រកាសបើកការស៊ើបអង្កេតរកមូលហេតុដែលនាំឱ្យមានហេតុការណ៍នេះ៕