ក្រសួងការបរទេសអាម៉េរិក បានអនុម័តការលក់មីស៊ីលអាកាសប្រឆាំងអាកាសចំនួន ១០០ គ្រាប់ រួមនឹងអាវុធជាច្រើនផ្សេងទៀត ក្នុងតម្លៃ ១.១ ពាន់លានដុល្លារអាម៉េរិក ទៅ ឱ្យ កោះតៃវ៉ាន់។
ការិយាល័យសហប្រតិបត្តិការសន្តិសុខការពារជាតិ (DSCA) របស់ មន្ទីរបញ្ចកោណ កាលពីថ្ងៃទី ០២ កញ្ញា បានប្រកាសថា ក្រសួងការបរទេសអាម៉េរិក បានអនុម័តការលក់អាវុធ និងឧបករណ៍យោធាតម្លៃ ១.១ ពាន់លានដុល្លារ ទៅឱ្យ កោះតៃវ៉ាន់។
កញ្ចប់អាវុធនេះរួមមាន មីស៊ីល AIM-9 Sidewinder ចំនួន ១០០ គ្រាប់ តម្លៃប្រហែល ៨៥.៦ លានដុល្លារ, មីស៊ីលប្រឆាំងនាវាពិឃាត Harpoon ចំនួន ៦០ គ្រាប់ តម្លៃប្រហែល ៣៥៥ លានដុល្លារ រួមនឹងប្រព័ន្ធគាំទ្រសម្រាប់រ៉ាដា តម្លៃប្រហែល ៦៦៥.៤ លានដុល្លារ។
សភាអាម៉េរិក នឹងពិនិត្យអនុម័តលើការលក់អាវុធរបស់ ក្រសួងការបរទេសអាម៉េរិក ខាងលើនេះ ប៉ុន្តែ មន្ត្រីជាច្រើនរូបរបស់ សហរដ្ឋអាម៉េរិក បានអះអាងថា កញ្ចប់អាវុធតម្លៃ ១.១ ពាន់លានដុល្លារនេះ ប្រាកដជាមិនជួបការរាំងខ្ទប់នៅ សភាអាម៉េរិក ឡើយ ព្រោះថា ទាំងបក្សប្រជាធិបតេយ្យ ទាំងបក្សសាធារណរដ្ឋ សុទ្ធតែមិនមានការប្រឆាំង។
អ្នកនាំពាក្យរបស់ ស្ថានទូតចិន នៅ សហរដ្ឋអាម៉េរិក លោក Liu Pengyu បានអំពាវនាវឱ្យ សហរដ្ឋអាម៉េរិក «ដកហូត» ការសម្រេចលក់អាវុធឱ្យ កោះតៃវ៉ាន់ នេះ ជាបន្ទាន់។ «ប្រការនេះកំពុងតែបញ្ជូនសារមិនត្រឹមត្រូវទៅឱ្យ ក្រុមទាមទារឯករាជ្យនៅ កោះតៃវ៉ាន់ និងបង្កគ្រោះថ្នាក់ដល់ទំនាក់ទំនងរវាង ចិន និង អាម៉េរិក ក៏ដូចជាសន្តិភាព ស្ថិរភាពនៅ ច្រកសមុទ្រតៃវ៉ាន់» លោក Liu Pengyu បញ្ជាក់ដូច្នេះ៕