អតីតប្រធានាធិបតីស្រីលង្កា លោក Rajapaksa ត្រលប់ចូលប្រទេសវិញ ក្រោយរយៈពេល ៧ សប្ដាហ៍ដែលបាននិរទេសខ្លួនក្នុងអំឡុងប្រទេសនេះធ្លាក់នៅក្នុងវិបត្តិសេដ្ឋកិច្ច និងនយោបាយ។
មន្ត្រីអាកាសយានដ្ឋាននៅ ស្រីលង្កា បានឱ្យដឹងថា អតីតប្រធានាធិបតី Gotabaya Rajapaksa ត្រូវបានក្រុមរដ្ឋមន្ត្រី និងក្រុមអ្នកនយោបាយរបស់ប្រទេសនេះចេញមកទទួលនៅព្រលានយន្តហោះកាលពីថ្ងៃទី ០២ កញ្ញា។
លោក Rajapaksa វ័យ ៧៣ ឆ្នាំ បានត្រលប់មកប្រទេសវិញ ក្រោយរយៈពេល ៥២ ថ្ងៃដែលបានរស់នៅនិរទេសខ្លួនចាប់តាំងពីបានរត់គេចទៅបរទេស នៅពេលប្រឈមនឹងបាតុកម្ម កាលពីថ្ងៃទី ១៣ កក្កដា។ លោក Rajapaksa មុននោះ បានផ្ញើលិខិតលាលែងពីតំណែង និងត្រូវបានសភាយល់ព្រម។
មន្ត្រីការពារជាតិមួយរូបរបស់ ស្រីលង្កា បានឱ្យដឹងថា លោក Rajapaksa រស់នៅក្នុងសណ្ឋាគារមួយនៅ ប្រទេសថៃ «មិនខុសអ្វីទៅនឹងអ្នកទោស» និងមានបំណងវិលត្រលប់មកប្រទេសវិញ។
«អង្គភាពសន្តិសុខមួយទើបតែត្រូវបានបង្កើតឡើងដើម្បីការពារសុវត្ថិភាពរបស់លោក Rajapaksa ក្រោយពីលោកបានត្រលប់មកប្រទេស ក្នុងនោះមានសមាជិកមកពីជួរកងទ័ព និងប៉ូលិសពិសេស» មន្ត្រីការពារជាតិខាងលើបន្ថែមដូច្នេះ។
យោងតាមរដ្ឋធម្មនុញ្ញរបស់ ស្រីលង្កា អតីតប្រធានាធិបតីទាំងឡាយរបស់ប្រទេសនេះ នឹងទទួលបានការការពារពីក្រុមអង្គរក្ស ផ្ទះស្នាក់នៅ និងយានជំនិះមួយគ្រឿង។
អតីតប្រធានាធិបតីស្រីលង្កា លោក Rajapaksa បានក្លាយជាចំណុចកណ្ដាលនៃការរិះគន់របស់ហ្វូងបាតុករនៅ ស្រីលង្កា នៅពេលប្រទេសនេះធ្លាក់ទៅក្នុងវិបត្តិសេដ្ឋកិច្ច។ ក្រុមបាតុករយល់ថា លោក Rajapaksa បានធ្វើឱ្យមានកំហុសជាច្រើនដែលនាំឱ្យប្រទេសជាតិធ្លាក់ទៅក្នុងវិបត្តិសេដ្ឋកិច្ច អតិផរណាកើនឡើងខ្ពស់ខ្លាំង និងអស់ទុនបម្រុងជារូបិយប័ណ្ណបរទេស៕