រដ្ឋាភិបាលរបស់លោក ចូ បៃដិន កំពុងតែរៀបចំស្នើសភា អនុម័តគម្រោងលក់អាវុធតម្លៃខ្ទង់ពាន់លានដុល្លារអាម៉េរិក ឱ្យ កោះតៃវ៉ាន់។
ប្រភពព័ត៌មានសុំមិនបញ្ចេញឈ្មោះចំនួន ៣ ដែលដឹងច្បាប់អំពីបញ្ហាខាងលើ កាលពីថ្ងៃទី ២៩ សីហា បានឱ្យដឹងថា រដ្ឋាភិបាលរបស់ប្រធានាធិបតី បៃដិន មានផែនការស្នើឱ្យសភាអនុម័តគម្រោងលក់អាវុធតម្លៃ ១.១ ពាន់លានដុល្លារទៅឱ្យ តៃវ៉ាន់ នៅពេលស្ថានការណ៍នៅ ច្រកសមុទ្រតៃវ៉ាន់ កំពុង «ឡើងកម្ដៅខ្លាំង»។
សមាជិកនានារបស់គណកម្មការកិច្ចការបរទេស នៅក្នុងសភាជាន់ទាប និងជាន់ខ្ពស់របស់ សហរដ្ឋអាម៉េរិក នឹងត្រូវធ្វើការអនុម័តគម្រោងលក់អាវុធខាងលើនេះ មុនពេលវាត្រូវបានអនុវត្ត។ គម្រោងនេះទំនងជានឹងអាចឆ្លងផុតសភាទាំងពីររបស់ សហរដ្ឋអាម៉េរិក ប៉ុន្តែ ដំណើរការនៃការអនុម័តប្រហែលជាត្រូវចំណាយពេលយូរ ដោយសារថា សភាអាម៉េរិក កំពុងស្ថិតក្នុងរដូវវិស្សមកាល។
ប្រភពព័ត៌មាននានាបានឱ្យដឹងថា គម្រោងលក់អាវុធខាងលើនេះនឹងរួមមាន មីស៊ីលប្រឆាំងនាវាចម្បាំង AGM-84L Harpoon Block II ដែលបាញ់ចេញពីយន្តហោះ ចំនួន ៦០ គ្រាប់ តម្លៃ ៣៥៥ លានដុល្លារ និងមីស៊ីលការពារដែនអាកាស AIM-9X Sidewinder Block II ១០០ គ្រាប់ តម្លៃ ៨៥.៦ លានដុល្លារ រួមនឹងកញ្ចប់អាវុធដែលទាក់ទិននឹងរ៉ាដា តម្លៃ ៦៥៥.៤ លានដុល្លារផងដែរ។
ក្រុមមន្ត្រីនៅ ក្រសួងការបរទេសអាម៉េរិក បានបដិសេធការអធិប្បាយអំពីព័ត៌មានក្រៅផ្លូវការនេះ ខណៈដែលតំណាងសភាទាំងពីររបស់ សហរដ្ឋអាម៉េរិក ក៏មិនទាន់មានការឆ្លើយតបនឹងសំណួរទាក់ទិននឹងបញ្ហាខាងលើនេះនៅឡើយ៕