បន្ទាប់ពីបង្ហោះសារស្វែងរកការងារលើ Facebook នារីចិនតៃវ៉ាន់ ម្នាក់ ឈ្មោះ Yu Tang ត្រូវបានស្ត្រីម្នាក់សុំស្គាល់ និងអញ្ជើញឱ្យចេញទៅបរទេសដើម្បីធ្វើជាអ្នកឆ្លើយឆ្លងតាមអ៊ីនធើណិត ជួយសម្រួលដល់អតិថិជននៅក្នុងបនល្បែងអនឡាញ ឬហៅថា កាស៊ីណូអនឡាញ។
Yu Tang ដែលជានារីម្នាក់រស់នៅលើ កោះតៃវ៉ាន់ បានឱ្យដឹងថា ស្ត្រីជនជាតិតៃវ៉ាន់ ម្នាក់ កាលពីខែមេសា ២០២២ បានណែនាំឱកាសការងារក្នុងវិស័យហ្គេមអនឡាញ និងកាស៊ីណូនៅបរទេសដល់នាង។ ស្ត្រីរូបនេះសន្យាថា ជួយបង់ថ្លៃសំបុត្រយន្តហោះទាំងទៅទាំងមកដល់នាង បើសិនមិនពេញចិត្តនឹងការងារ ហើយថែមទាំងសុំជួបផ្ទាល់ដើម្បីចរចា។
Yu Tang យល់ព្រមទទួលយកការងារ បន្ទាប់ពីបានជួបចរចាគ្នា ហើយក្រោយមក នាងក៏ត្រូវបាននាំទៅកាន់ព្រលានយន្តហោះ ជាកន្លែងដែលនាងបានជួបមនុស្សជាច្រើនដែលមានស្ថានភាពដូចនាង។ ពួកគេបានធ្វើដំណើរមកកាន់ ភ្នំពេញ។ ក្រុមមនុស្សចេញមកទទួលដែលហៅខ្លួនឯងថាជា «ក្រុមហ៊ុនទេសចរណ៍ ប៉ុន្តែ មើលរូបរាងដូចទៅនឹងក្រុមសង្គមងងឹត» នាង Yu Tang រៀបរាប់។
ពួកគេរក្សាលិខិតឆ្លងដែនរបស់ក្រុមដែលមាន Yu Tang ដោយប្រាប់ថា ដើម្បីទិញស៊ីមកាត ប៉ុន្តែ ក្រោយមកក៏នៅតែមិនព្រមសងមកវិញ។
នាង Yu Tang បន្តថា «ពេលនោះ ពួកយើងសង្ស័យថា ត្រូវគេនាំមកលក់។ ខ្ញុំដឹងថា បើចង់សុំជំនួយ ខ្ញុំត្រូវតែមានស៊ីមកាត»។ រាល់ទិន្នន័យដែលកត់ត្រាអំពីការជជែកជាមួយក្រុមមេខ្យល់ សុទ្ធតែត្រូវក្រុមអ្នកគ្រប់គ្រងនៅ កម្ពុជា លុបចោល។ Yu និងអ្នករួមដំណើរ ត្រូវបាននាំទៅកាន់កាស៊ីណូនៅ ក្រុងព្រះសីហនុ។
នៅទីនេះ ក្រុមអ្នកគ្រប់គ្រងប្រកាសថា ពួកគេត្រូវតែចូលរួមក្នុងបណ្ដាញឆបោកអនឡាញតាមទូរស័ព្ទ ក៏ដូចជាត្រូវរកឱ្យបានមនុស្សម្នាក់ទៀតមកជំនួសដើម្បីជាការបង់ថ្លៃ ១៧,០០០ ដុល្លារអាម៉េរិក បើសិនចង់មានសេរីភាព។ Yu បានឱ្យដឹងថា មនុស្សម្នាក់បានជំទាស់ត្រូវគេវាយដល់សន្លប់ ហើយមកដល់ពេលនេះនៅតែស្ថិតក្នុងបញ្ជីស្ដីពី ជនជាតិតៃវ៉ាន់ ដែលបានបាត់ខ្លួន។
Yu រកទិញស៊ីមកាត់បានមួយ និងចាប់ផ្ដើមស្វែងរកព័ត៌មានទាក់ទងនឹងសកម្មភាពជួញដូរមនុស្ស។ នាងរកវិធីទាក់ទងតាម Facebook ជាមួយអ្នកនយោបាយមួយក្រុមនៅក្នុងតំបន់ ដើម្បីសុំជំនួយ។ នេះបើតាមទីភ្នាក់ងារសារព័ត៌មាន The Guardian។
មួយថ្ងៃក្រោយមក ក្រុមប៉ូលិស និងទាហានបានទៅដល់កាស៊ីណូទទួលនាង។ Yu Tang ចោទថា ម្ចាស់កាស៊ីណូបានស្នើបង់ប្រាក់ឱ្យក្រុមមន្ត្រីនោះ ជាថ្នូរនឹង «ការធ្វើមិនដឹង មិនឮ» ប៉ុន្តែ ត្រូវបានបដិសេធ។ នាងក៏ត្រូវបានរំដោះ និងបានបញ្ជូនត្រលប់មកកាន់ កោះតៃវ៉ាន់ វិញ។
ប៉ូលិសតៃវ៉ាន់ ចិនដីគោក ហុងកុង ម៉ាកាវ កម្ពុជា និងប្រទេសដែលពាក់ព័ន្ធ កំពុងតែបើកយុទ្ធនាការទ្រង់ទ្រាយធំដើម្បីរំដោះជនរងគ្រោះ និងចាប់ខ្លួនក្រុមជួញដូរមនុស្ស។
ប៉ូលិសតៃវ៉ាន់ ឱ្យដឹងថា ជនជាតិតៃវ៉ាន់ រាប់រយនាក់ ស្ថិតក្នុងចំណោមជនរងគ្រោះដែលត្រូវឃុំខ្លួន និងរំលោភកម្លាំងពលកម្មនៅក្នុងបណ្ដាញឆបោកតាមអ៊ីនធើណិតនៅ អាស៊ីអាគ្នេយ៍។ ក្រុមសង្គមងងិតនេះ ធ្វើសកម្មភាពបោកប្រាស់ ដោយការសន្យាថា នឹងផ្ដល់កន្លែងស្នាក់នៅ ប្រាក់ខែខ្ពស់ជាដើម នៅក្នុងប្រទេសមួយចំនួននៅ អាស៊ីអាគ្នេយ៍។ ពេលទៅដល់កន្លែង ក្រុមនេះតែងប្រមូលយកឯកសារសំខាន់ៗរបស់ជនរងគ្រោះ និងលក់ទៅឱ្យក្រុមសង្គមងងិតដទៃ។
មន្ត្រីតៃវ៉ាន់ ឱ្យដឹងថា ជនជាតិតៃវ៉ាន់ ជិត ៥,០០០ នាក់ ដែលបានមក កម្ពុជា រហូតមកទល់នឹងពេលនេះ មិនទាន់ត្រលប់ទៅកាន់ តៃវ៉ាន់ នៅឡើយ។
Yu Tang ឱ្យដឹងថា នាងបានឃើញយ៉ាងហោច ៥០ នាក់ ត្រូវឃុំនៅក្នុងការិយាល័យដែលនាងធ្វើការ និងរស់នៅ។ មនុស្សជាច្រើនត្រូវបង្ខំចិត្តចុះកិច្ចសន្យាដើម្បីបំភាន់ភ្នែកសមត្ថកិច្ចកម្ពុជា បង្ការមានអ្នកមកសួរអំពីស្ថានភាពអ្នកដែលស្នាក់នៅក្នុងអគាររបស់ពួកគេ។
ក្រោយពីបានត្រលប់ទៅដល់ តៃវ៉ាន់ Yu Tang តែងតែទាក់ទងទៅកាន់ក្រុមគ្រួសារជនរងគ្រោះ និងក្រុមមនុស្សដែលអាចជាជនរងគ្រោះកំពុងស្វែងរកជំនួយ ក៏ដូចជាសហការជាមួយសមត្ថកិច្ច។ មកដល់បច្ចុប្បន្ន Yu បានជួយឱ្យមនុស្ស ៨ នាក់ ត្រលប់មក តៃវ៉ាន់។
យ៉ាងហោចមាន ៤៦ នាក់ បានត្រលប់ទៅកាន់ តៃវ៉ាន់ ក្នុងប៉ុន្មានខែចុងក្រោយនេះ។ មនុស្សមួយចំនួនបានរាយការណ៍ថា ពួកគេ ឬអ្នកផ្សេងត្រូវគេបង្ខំឱ្យចុះកិច្ចសន្យា ត្រូវគេវាយដំ រំលោភបំពាន ត្រូវបង្អត់អាហារ និងត្រូវគេគំរាមជាញឹកញាប់។ ជនរងគ្រោះខាងលើនិយាយថា ក្រុមជួញដូរមនុស្សភាគច្រើនគឺជា ជនជាតិតៃវ៉ាន់ ចិនដីគោក និង ថៃ។
នាយឧត្តមសេនីយ៍ ឆៃ ស៊ីណារិទ្ធ អគ្គស្នងការនគរបាលជាតិស្តីទី បានឱ្យដឹងថា អាជ្ញាធរកម្ពុជា បានបំបែកផែនការបោកប្រាស់តាមអនឡាញដែលសំដៅលើពលករបរទេស និងបានចាប់ខ្លួនជនជាតិចិន និង តៃវ៉ាន់ រាប់រយនាក់នាពេលកន្លង។
កាលពីចុងសប្ដាហ៍មុន ក្រសួងមហាផ្ទៃកម្ពុជា ក៏បានប្រកាសបើកយុទ្ធនាការស្រាវជ្រាវទូទាំងប្រទេស ទាក់ទិននឹងស្ថានភាពជនបរទេសដែលធ្វើការ ឬរស់នៅក្នុងសណ្ឋាគារ ផ្ទះជួល និងកាស៊ីណូជាដើម ដើម្បីតាមរកជនល្មើសក្នុងបណ្ដាញជួញដូរមនុស្ស៕