ប្រធានាធិបតីអ៊ុយក្រែន លោក ហ្សេឡែនស្គី បានប្រកាសជាថ្មីថានឹងដណ្ដើម គ្រីមៀ មកវិញ តាមគ្រប់មធ្យោបាយទាំងអស់ដែល ទីក្រុងកៀវ យល់ថា ត្រឹមត្រូវ» ហើយសង្គ្រាមនេះនឹងបញ្ចប់នៅ ឧបទ្វីបគ្រីមៀ (Crimea)។
«យើងនឹងដណ្ដើមយក គ្រីមៀ ដែលជាទឹកដីរបស់យើង ត្រលប់មកវិញ ដោយប្រើគ្រប់មធ្យោបាយដែលយើងយល់ថា ត្រឹមត្រូវ ហើយមិនបាច់សុំយោបល់ពីប្រទេសដទៃ» ប្រធានាធិបតី ហ្សេឡែនស្គី ថ្លែងនៅក្នុងសន្និសីទ «មូលដ្ឋានគ្រីមៀ» កាលពីថ្ងៃទី ២៣ សីហា។
សន្និសីទខាងលើមានការចូលរួមរបស់តំណាងប្រទេស និងអង្គការអន្តរជាតិចំនួន ៦០ ដែលរៀបចំឡើងដោយ អ៊ុយក្រែន ដើម្បីជាការគាំទ្រដល់ការប្រកាសអធិបតេយ្យភាពរបស់ ទីក្រុងកៀវ ចំពោះ ឧបទ្វីបគ្រីមៀ។ យោងតាមលោក ហ្សេឡែនស្គី អ៊ុយក្រែន មានកម្លាំងខ្លាំងគ្រប់គ្រាន់ដើម្បីធ្វើឱ្យគំនិតស្ដីពី «គ្រីមៀ ជារបស់ អ៊ុយក្រែន» ក្លាយជាការពិត។
លោក ហ្សេឡែនស្គី បញ្ជាក់ជាថ្មីថា «យើងត្រូវតែរំដោះ គ្រីមៀ…គ្រប់យ៉ាងចាប់ផ្ដើមនៅ គ្រីមៀ ហើយនឹងត្រូវតែបញ្ចប់នៅ គ្រីមៀ»។
ប្រធានាធិបតីអ៊ុយក្រែន ថ្លែងថា «ចាប់តាំងពីថ្ងៃទី ២៤ កុម្ភៈ រុស្ស៊ី បានបាញ់មីស៊ីលរយៈចម្ងាយឆ្ងាយ ៧៥០ គ្រាប់ ចេញពី គ្រីមៀ សំដៅលើទីក្រុងនានរបស់ អ៊ុយក្រែន»។ ឧបទ្វីបគ្រីមៀ ដែលត្រូវបាន រុស្ស៊ី រឹបអូសកាលពីឆ្នាំ ២០១៤ តាមរយៈការធ្វើប្រជាមតិ ស្ថិតនៅជាប់នឹងខេត្ត Kherson ភាគខាងត្បូងរបស់ អ៊ុយក្រែន ដែលបច្ចុប្បន្នត្រូវ រុស្ស៊ី គ្រប់គ្រង៕
