ឃ្លាំងដាក់អាវុធមួយនៅ ភាគខាងត្បូងប្រទេសរុស្ស៊ី ក្បែរព្រំដែនជាមួយ អ៊ុយក្រែន កាលពីម្សិលមិញបានឆាបឆេះ ក្រោយមក ក្រុមមន្ត្រីក្នុងតំបន់និយាយថា មូលហេតុមកពីអាកាសធាតុក្ដៅពេក។
Vyacheslav Gladkov អភិបាលតំបន់ Belgorod បានឱ្យដឹងថា ប្រជាជននៅជុំវិញភូមិ Timonovo ត្រូវបានឈ្លៀសនៅពេលឃ្លាំងអាវុធចាប់ផ្ដើមឆេះ។ មិនមានអ្នករងរបួសនោះទេ បន្ទាប់ពី ហេតុការណ៍បានកើតឡើង។
នេះគឺជាលើកទីពីរនៅក្នុងរយៈពេលមិនដល់ ១ សប្ដាហ៍ ដែលឃ្លាំងអាវុធរបស់ រុស្ស៊ី មួយនេះត្រូវឆេះ។ កាលពីសប្ដាហ៍កន្លង ប្រជាជនក្នុងភូមិ Timonovo និង Soloti ដែលមានចម្ងាយប្រមាណ ១៥ គីឡូម៉ែត្រពី ប្រទេសអ៊ុយក្រែន ក៏ត្រូវរត់រកទីសុវត្ថិភាព ដោយសារហេតុការណ៍ផ្ទុះឆេះឃ្លាំងអាវុធនៅក្បែរនោះ។
មួយរយៈពេលចុងក្រោយនេះ អភិបាល Gladkov បានទម្លាក់កំហុសជាបន្តបន្ទាប់ទៅលើកងកម្លាំងរបស់ អ៊ុយក្រែន ទាក់ទិននឹងករណីឆេះ និងផ្ទុះនានានៅក្នុង និងជុំវិញតំបន់ Belgorod ដែលមានចម្ងាយពី ទីក្រុងមូស្គូ ប្រហែល ៦៥០ គីឡូម៉ែត្រទៅទិសខាងត្បូង។
ទីក្រុងកៀវ តែងតែចៀសវាងការប្រកាសថាជាស្នាដៃរបស់ កងកម្លាំងអ៊ុយក្រែន ប៉ុន្តែ ក៏តែងតែចំអកឱ្យ ទីក្រុងមូស្គូ ថា មិនមានការប្រុងប្រយ័ត្ន៕