ទិដ្ឋភាពនៅក្នុងវីដេអូបង្ហាញថា នាវាទេសចរណ៍បណ្ដោយជិត ៤០ ម៉ែត្រ លិចបន្តិចម្ដងៗ រហូតដល់បាត់ខ្លួនទាំងស្រុងនៅកណ្ដាលសមុទ្រភាគខាងត្បូងនៃ ប្រទេសអ៊ីតាលី បន្ទាប់ពីក្រុមនាវិកត្រូវបានសង្គ្រោះ។
នាវាទេសចរណ៍លំដាប់ប្រណិត My Saga ដែលមានប្រវែង ៣៩.៤ ម៉ែត្រ បានជួបគ្រោះថ្នាក់កាលពីថ្ងៃទី ២០ សីហា នៅលើសមុទ្រ Catanzaro Marina ភាគខាងត្បូងនៃ ប្រទេសអ៊ីតាលី។ អាកាសធាតុមិនអំណោយផលល្អ ធ្វើឱ្យកប៉ាល់សង្គ្រោះមិនអាចអូស My Saga ទៅដល់ទីសុវត្ថិភាព។
វីដេអូដែលត្រូវបាន Sky News ចុះផ្សាយកាលពីថ្ងៃទី ២២ សីហា បង្ហាញថា នាវាទេសចរណ៍ខ្នាតធំនេះផ្ដេកខ្លួនលើផ្ទៃទឹក នៅពេលសមុទ្រមានរលកធំៗ។ កន្ទុយរបស់ My Saga លិចបន្តិចម្ដងៗ រហូតដល់នាវានេះបាត់ខ្លួនទាំងស្រុកពីលើផ្ទៃទឹក។
កងកម្លាំងប៉ូលិសរបស់ អ៊ីតាលី បានជួយសង្គ្រោះសមាជិកក្រុមនាវិកបាន ៩ នាក់ ពីនាវានេះ។ នៅពេលជួបគ្រោះថ្នាក់ ពុំមានទេសចរណាម្នាក់នៅលើនាវានេះឡើយ។
ការស៊ើបអង្កេតមួយកំពុងត្រូវបានធ្វើឡើងដើម្បីស្វែងរកមូលហេតុដែលនាំឱ្យនាវា My Saga ជួបគ្រោះថ្នាក់។
យោងតាម Super Yacht Times នាវានេះត្រូវបានសាងសង់នៅ អ៊ីតាលី កាលពីឆ្នាំ ២០០៧ និងកំពុងធ្វើដំណើរពី ឧបទ្វីប Gallipoli របស់ តួកគី ឆ្ពោះទៅកាន់ Milazzo នៅភាគខាងត្បូងនៃ ប្រទេសអ៊ីតាលី។ នាវានេះដោតទង់ជាតិរបស់ ប្រជុំកោះ Cayman ប៉ុន្តែ នាវិកទាំងអស់គឺជាពលរដ្ឋរបស់ អ៊ីតាលី៕
