ស្ថានីយសង្កេតគ្រោះរាំងស្ងួតសកលរបស់ សហភាពអឺរ៉ុប រកឃើញថា ១៧% នៃ តំបន់អឺរ៉ុប បច្ចុប្បន្នស្ថិតក្នុងបញ្ជីដែលត្រូវប្រកាសអាសន្នកម្រិតខ្ពស់បំផុតស្ដីពីស្ថានភាពរាំងស្ងួត។
គ្រោះរាំងស្ងួតធ្ងន់ធ្ងរបាន និងកំពុងតែវាយប្រហារលើតំបន់ជាច្រើននៅ អឺរ៉ុប ហើយវាក៏កំពុងតែវិវត្តទៅរកភាពអាក្រក់កាន់តែខ្លាំង។ បើទោះជាភ្លៀងធំៗបានជួយផ្ដល់ប្រយោជន៍នៅតំបន់មួយចំនួន ប៉ុន្តែ ឥទ្ធិពលរបស់ភ្លៀងខ្យល់ក៏បានបណ្ដាលឱ្យមានការខាតបង់ច្រើនផងដែរ។
ក្នុងរបាយការណ៍ប្រចាំខែនាពេលថ្មីៗបំផុតនេះ ស្ថានីយសង្កេតគ្រោះរាំងស្ងួតសកលរបស់ សហភាពអឺរ៉ុប (EU-GDO) បានបញ្ជាក់ថា បាតុភូតទន្លេ ដីធ្លីត្រូវរាំងស្ងួតហួតហែងកំពុងតែកើតឡើងដោយសារអាកាសធាតុក្ដៅខ្លាំងចាប់ពីខែឧសភា និងស្ថានភាពខ្វះទឹកភ្លៀងដែលបានអូសបន្លាយពេលយូរ។
យោងតាមរបាយការណ៍ គ្រោះរាំងស្ងួតធ្ងន់ធ្ងរប៉ះពាល់ដល់តំបន់នានានៅ អឺរ៉ុប ដែលបានចាប់ផ្ដើមកើតឡើងពីដើមឆ្នាំមកនេះ នៅតែបន្តពង្រីកខ្លួន និងក្លាយទៅជាអាក្រក់ជាងមុនចាប់ពីដើមខែសីហា។
ហានិភ័យនៃការកើនឡើងរបស់គ្រោះរាំងស្ងួត ត្រូវបានព្យាករថា បន្តបង្ហាញវត្តមាននៅក្នុងប្រទេសមួយចំនួននៅ អឺរ៉ុប មានដូចជា អ៊ីតាលី អេស្ប៉ាញ ព័រទុយហ្គាល បារាំង អាល្លឺម៉ង់ ហូឡង់ បែលហ្ស៊ិក អៀឡង់ លុចសំបួ រ៉ូម៉ានី និង ហុងគ្រី ក៏ដូចជាបណ្ដាប្រទេសដែលមិនស្ថិតក្នុង សហភាពអឺរ៉ុប មានដូចជា អង់គ្លេស អ៊ុយក្រែន និង ម៉ុលដាវី ជាដើម។
តាមការព្យាករ ទឹកដីនៅ តំបន់អឺរ៉ុប ប្រមាណ ១៧% ស្ថិតក្នុងបញ្ជីដែលត្រូវប្រកាសអាសន្នកម្រិតខ្ពស់បំផុត និងខ្ពស់ជាងឆ្ងាយបើធៀបនឹង ១១% ដែលបានលើកឡើងកាលពីខែកក្កដា៕
