សមត្ថកិច្ចនៅ អេមីរ៉ាត់អារ៉ាប់រួម (UAE) ព្រមានថា នឹងពិន័យជាប្រាក់ប្រហែល ១,៣០០ ដុល្លារអាម៉េរិក ហើយអាចអមជាមួយនឹងទោសជាប់ពន្ធនាគារ ចំពោះមនុស្សគ្រប់រូបដែលទុកក្មេងតូចនៅក្នុងឡានតែម្នាក់ឯងដោយមិនមានអ្នកមើលថែ។
សមត្ថកិច្ច UAE បានឱ្យដឹងថា ការទុកឱ្យក្មេងតូចនៅក្នុងឡានពិតជាគ្រោះថ្នាក់ណាស់ ពិសេសគឺនៅក្នុងរដូវក្ដៅ ជាពេលដែលសីតុណ្ហភាពនៅទូទាំងប្រទេសនេះ ឡើងដល់ ៤៨ អង្សាសេ។ ប៉ូលិស UAE ឱ្យដឹងថា ការបណ្ដោយឱ្យក្មេងតូចនៅក្នុងឡានម្នាក់ឯង ដោយមិនមានអ្នកមើលថែ ត្រូវបានចាត់ទុកថាជាអំពើដែលតម្រូវឱ្យមានការដាក់ទោស។
ទោសដែលអ្នកល្មើសនឹងការកំណត់ខាងលើត្រូវទទួល រួមមាន ការពិន័យជាប្រាក់យ៉ាងតិច ៥,០០០ ដាហាម (រូបិយប័ណ្ណរបស់ អេមីរ៉ាតអារ៉ាប់រួម) ស្មើនឹង ១,៣០០ ដុល្លារអាម៉េរិក។ ការព្រមានរបស់ អាជ្ញាធរ UAE ត្រូវបានធ្វើឡើងបន្ទាប់ពីមានករណីទុកក្មេងតូចក្នុងឡានរហូតដល់បាត់បង់ជីវិត។
សមត្ថកិច្ច UAE បានក្រើនរម្លឹកដល់អាណាព្យាបាលគ្រប់រូប ឱ្យពិនិត្យមើលក្នុងរថយន្តឱ្យបានគ្រប់ពេល មុនពេលបិទសោរថយន្ត។ អ្នកមើលថែក្មេងត្រូវទទួលខុសត្រូវចំពោះសុវត្ថិភាព និងសុខភាពរបស់ក្មេងតូច៕
