ក្រុមយន្តហោះរបស់ចិន ត្រូវបានបញ្ជូនទៅបាញ់សារធាតុ អ៊ីយ៉ូតប្រាក់ ទៅលើមេឃ ដើម្បីបង្កើតភ្លៀងសម្រាប់តំបន់ក្បែរៗទន្លេ Yangtze ក្នុងគ្រាដែលតំបន់នេះកំពុងជួបគ្រោះរាំងស្ងួតយ៉ាងធ្ងន់ធ្ងរ និងកម្ដៅកើនឡើងខ្ពស់ខ្លាំង។
អាជ្ញាធរតំបន់ជាច្រើននៅក្បែរទន្លេ Yangtze ដែលជាទន្លេវែងបំផុតនៅ ទ្វីបអាស៊ី និងឈរលំដាប់ទី ៣ នៅលើពិភពលោក បានបង្កើតយុទ្ធនាការអន្តរាគមន៍ដើម្បីកែប្រែអាកាសធាតុ ប៉ុន្តែ ពពកស្ដើងពេក ទើបមិនទាន់បង្កើតជាភ្លៀងបាន។
នៅក្នុងប្រកាសកាលពីថ្ងៃទី ១៧ សីហា ក្រសួងធនធានទឹករបស់ ចិន បានឱ្យដឹងថា ស្ថានភាពរាំងស្ងួតនៅតាមតំបន់បណ្ដោយទន្លេ Yangtze កំពុងបង្កផលអាក្រក់ដល់សន្តិសុខប្រភពទឹករបស់ប្រជាជន សត្វចិញ្ចឹម និងផលដំណាំ»។
ក្នុងថ្ងៃដដែល ខេត្ត Hubei គឺជាតំបន់ថ្មីបំផុតដែលប្រកាសថា នឹងបង្កើតពពកសិប្បនិម្មិតដោយប្រើប្រាស់សារធាតុ អ៊ីយ៉ូតប្រាក់ ដើម្បីបង្អុរទឹកភ្លៀង។
អ៊ីយ៉ូតប្រាក់ ដែលដាក់នៅក្នុងបំពង់តូចៗប៉ុនដើមបារី នឹងត្រូវបានបាញ់ទៅក្នុងពពកដែលមានបច្ចុប្បន្ន ដើម្បីបង្កើតបានជាភាគល្អិតនៃទឹកកក។ ភាគល្អិតទាំងនេះជួយឱ្យពពកមានសំណើមជាងមុន ហើយគ្រាប់ទឹកក្នុងពពកក៏ងាយស្រួលធ្លាក់ជាភ្លៀង។
បច្ចេកទេសបង្កើតពពកភ្លៀង ឬភ្លៀងសិប្បនិម្មិតនេះត្រូវបានប្រើប្រាស់តាំងតែពីទសវត្សរ៍ឆ្នាំ ១៩៤០ ហើយ ប្រទេសចិន មានកម្មវិធីនេះធំជាងគេបង្អស់។ ប្រទេសចិន ធ្លាប់បានបង្កើតភ្លៀងសិប្បនិម្មិតនៅមុនព្រឹត្តិការណ៍អូឡាំពិកប៉េកាំង ២០០៨ ដើម្បីធានាឱ្យបានប្រាកដថា អាកាសធាតុស្ងួត មិនមានភ្លៀងនៅពេលព្រឹត្តិការណ៍នេះកំពុងត្រូវបានធ្វើឡើង៕