យ៉ាងហោចណាស់មានហេតុការណ៍ផ្ទុះចំនួន ៤ ករណី បានកើតឡើងនៅក្បែរព្រលានយន្តហោះ Belbek នៅ គ្រីមៀ (Crimea) ដែលក្រោយមក ក្រុមមន្ត្រីរុស្ស៊ី អះអាងថា បានបាញ់ទម្លាក់យន្តហោះគ្មានមនុស្សបើកមួយគ្រឿងរបស់ អ៊ុយក្រែន។
Mikhail Razvozhayev អភិបាលតំបន់ Sevastopol នៅ ឧបទ្វីបគ្រីមៀ កាលពីយប់ថ្ងៃទី ១៨ សីហា បានឱ្យដឹងថា ករណីផ្ទុះមួយចំនួនកើតឡើងនៅតំបន់ជុំវិញព្រលានយន្តហោះយោធា Belbek ភាគខាងជើងទីក្រុង ប៉ុន្តែមិនបានបណ្ដាលឱ្យមានមនុស្សស្លាប់ ឬបង្កការខូចខាតណាមួយឡើយ។
ប្រភពព័ត៌មានចំនួន ៣ នៅ ឧបទ្វីបគ្រីមៀ ក៏បានបញ្ជាក់ថា យ៉ាងហោចណាស់មានហេតុការណ៍ផ្ទុះចំនួន ៤ ករណី កើតឡើងនៅក្បែរព្រលានយន្តហោះ Belbek កាលពីយប់មិញ។
«ទិន្នន័យដំបូងបានបង្ហាញថា យន្តហោះគ្មានមនុស្សបើក (UAV) ១ គ្រឿងរបស់ អ៊ុយក្រែន ត្រូវបានកងកម្លាំងការពារដែនអាកាសរបស់ រុស្ស៊ី បាញ់ទម្លាក់នៅក្បែរព្រលានយន្តហោះ Belbek» អភិបាលក្រុង Razvozhayev ឱ្យដឹងដូច្នេះ។
ក្រសួងការពារជាតិរបស់ រុស្ស៊ី និង អ៊ុយក្រែន មិនទាន់មានការអធិប្បាយអ្វីទៅនឹងព័ត៌មាននេះនៅឡើយ។
