ប្រតិភូតំណាងរាស្ត្ររបស់ ប្រទេសកាណាដា មានគម្រោងធ្វើទស្សនកិច្ចនៅ កោះតៃវ៉ាន់ ក្នុងខែតុលា ដើម្បីស្វែងរកឱកាសសហការផ្នែកសេដ្ឋកិច្ចក្នុង តំបន់អាស៊ី-ប៉ាស៊ីហ្វ៊ិក។
«គោលបំណងនៃដំណើរទស្សនកិច្ចនេះមិនមែនដើម្បីបង្កភាពរអាក់រអួល ឬបញ្ហាដល់ តៃវ៉ាន់ ក៏ដូចជា ចិនដីគោក។ ទស្សនកិច្ចនេះគឺផ្ដោតលើពាណិជ្ជកម្ម មិត្តភាព ឱកាសសម្រាប់ កាណាដា នៅ តំបន់អាស៊ី-ប៉ាស៊ីហ្វ៊ិក» Judy Sgro តំណាងរាស្ត្រមកពីបក្សសេរីភាពកាណាដា ថ្លែងកាលពីម្សិលមិញដូច្នេះ។
យោងតាមលោកស្រី Sgro ប្រតិភូតំណាងរាស្ត្រកាណាដា គ្រោងនឹងទៅដល់ កោះតៃវ៉ាន់ ក្នុងខែតុលាខាងមុខ។ ក្រុមមន្ត្រីនៅ អូតាវ៉ា តែងតែធ្វើទស្សនកិច្ច កោះតៃវ៉ាន់ ២ លើកក្នុង ១ ឆ្នាំ ប៉ុន្តែ មួយរយៈពេលចុងក្រោយនេះត្រូវផ្អាកដោយសារតែបញ្ហាកូវីដ-១៩។
រដ្ឋាភិបាលកាណាដា របស់លោកនាយករដ្ឋមន្ត្រី Justin Trudeau ប្រកាសគោរព និងគាំទ្រលើការសម្រេចចិត្តរបស់ក្រុមតំណាងរាស្ត្រនេះ។ ចំណែក ស្ថានទូតចិន នៅ រដ្ឋធានីអូតាវ៉ា វិញ មិនទាន់បញ្ចេញប្រតិកម្មអ្វីនៅឡើយ ប៉ុន្តែ គ្រប់ពេល ប្រទេសចិន តែងតែចាត់ទុក កោះតៃវ៉ាន់ ថាជាផ្នែកមួយនៃទឹកដីរបស់ខ្លួនដែលមិនអាចកាត់ផ្ដាច់បាន និងរង់ចាំតែការបង្រួបបង្រួមប៉ុណ្ណោះ៕
