រូបភាពពីផ្កាយរណបបង្ហាញថា យន្តហោះចម្បាំងជាច្រើនគ្រឿងរបស់ រុស្ស៊ី ត្រូវខូចខាត ក្នុងគ្រាដែលឃ្លាំងអាវុធស្ថិតក្នុងស្ថានភាពដដែល នៅក្នុងមូលដ្ឋាន Saki នៅ គ្រីមៀ បន្ទាប់ពីហេតុការណ៍ផ្ទុះដ៏ធំជាច្រើនករណីបានកើតឡើង។
រូបភាពពីផ្កាយរណបដែលប្រកាសកាលពីថ្ងៃទី ១០ សីហា ដោយក្រុមហ៊ុន Planet Labs និងត្រូវបានទំព័រយោធាអាម៉េរិក War Zone វិភាគ បានបង្ហាញអំពី ឥទ្ធិពលពីករណីផ្ទុះនៅឯព្រលានយន្តហោះយោធា Saki ក្បែរតំបន់ Novofyodorovka លើ ឧបទ្វីបគ្រីមៀ មុននោះមួយថ្ងៃ។
ការខូចខាត ភាគច្រើនកើតមាននៅតំបន់ភាគនិរតីនៃមូលដ្ឋានទ័ព Saki ជាទីដែលមានព្រលានយន្តហោះ និងលេណដ្ឋានការពារយន្តហោះ ចំណែកហេដ្ឋារចនាសម្ព័ន្ធសំខាន់ៗរបស់ព្រលានយន្តហោះនេះ មិនរងការខូចខាត។
«ពេលប្រៀបធៀបជាមួយនឹងរូបភាពមុនពេលកើតមានហេតុការណ៍ផ្ទុះ ឃើញថា យន្តហោះចម្បាំង Su-24 ចំនួន ៣ គ្រឿង និង Su-30 ១ គ្រឿង ត្រូវបានបំផ្លាញនៅលើចំណតសំខាន់របស់យន្តហោះ។ សំណង់ទាំងឡាយដែលនៅក្បែរនោះក៏រងការខូចខាតក្នុងកម្រិតផ្សេងៗគ្នា» អ្នកជំនាញផ្នែកយោធា Joseph Trevithick បានឱ្យដឹងដូច្នេះ។
រូបភាពពីផ្កាយរណបក៏បានបង្ហាញថា មានរណ្ដៅធំៗចំនួន ៤ ដែលមានទំហំប្រហាក់ប្រហែលគ្នា នៅលើចំណតរបស់យន្តហោះដែលមានលេណដ្ឋានការពារ។ យ៉ាងហោចណាស់ក៏មានយន្តហោះចម្បាំង Su-30 និង Su-24 ចំនួន ៣ គ្រឿង ត្រូវបានបំផ្លាញទាំងស្រុងនៅទីតាំងនេះ ខណៈដែល Su-24 ១ គ្រឿងទៀតដែលនៅក្បែរនោះ បានរងការខូចខាតធ្ងន់ធ្ងរ។
អគ្គិភ័យដ៏ធំមួយបានដុតកម្ទេចមួយភាគធំនៃវាលស្មៅនៅកណ្ដាលព្រលានយន្តហោះ ប៉ុន្តែ ឃ្លាំងអាវុធសំខាន់ និងទីលានផ្គុំអាវុធសម្រាប់យន្តហោះចម្បាំង មិនបានរងផលប៉ះពាល់។
សាក្សីបានឱ្យដឹងថា បានឮសំឡេងផ្ទុះយ៉ាងតិច ១២ គ្រាប់ នៅវេលាម៉ោងប្រហែល ១៥ និង ២០ នាទី ថ្ងៃទី ០៩ សីហា ចេញពីមូលដ្ឋានទ័ពអាកាស Saki ក្បែរ Novofyodorovka នៅលើ ឧបទ្វីបគ្រីមៀ។
ភាគីខាងរុស្ស៊ី និយាយថា ករណីផ្ទុះនៅឯព្រលានយន្តហោះខាងលើ គឺដោយសារការឆេះឃ្លាំងអាវុធ ពោលគឺមិនមែនដោយសារការវាយប្រហារពី អ៊ុយក្រែន ឡើយ។ ចំណែក អ៊ុយក្រែន វិញយល់ថា ករណីផ្ទុះទាំងនោះអាចបណ្ដាលមកពីភាពអន់ខ្សោយរបស់ រុស្ស៊ី ឬដោយសារការឆ្មក់វាយប្រហារពីសត្រូវរបស់ប្រទេសនេះ៕
