សភាជាន់ទាបអាម៉េរិក បោះឆ្នោតអនុម័តសេចក្ដីព្រាងច្បាប់ហាមឃាត់កាំភ្លើងវែង (rifles) គ្រាដែលប្រទេសនេះកំពុងតែប្រឈមនឹងអំពើបាញ់ប្រហារដោយខ្មាន់កាំភ្លើង។
កាលពីថ្ងៃទី ២៩ កក្កដា សភាជាន់ទាបអាម៉េរិក បានបោះឆ្នោតអនុម័តសេចក្ដីព្រាងច្បាប់ហាមឃាត់កាំភ្លើងវែងវាយប្រហារ ដោយមានសន្លឹកឆ្នោតគាំទ្រចំនួន ២១៧ សំឡេង និងប្រឆាំង ២១៤ សំឡេង។ សេចក្ដីព្រាងច្បាប់នេះត្រូវបានបញ្ជូនឡើងទៅកាន់ សភាជាន់ខ្ពស់អាម៉េរិក ដើម្បីអនុម័តបន្ត។
ការកែទម្រង់ក្នុងការគ្រប់គ្រងកាំភ្លើងនៅតែមានភាពចម្រូងចម្រាសនៅ សហរដ្ឋអាម៉េរិក បើទោះជាធ្លាប់មានករណីបាញ់ប្រហារជាបន្តបន្ទាប់។ ក្នុងការបោះឆ្នោតអនុម័តនៅសភាជាន់ទាបកាលពីម្សិលមិញ មានតំណាងរាស្ត្រមកពីបក្សសាធារណរដ្ឋ តែ ២ រូបប៉ុណ្ណោះ ដែលបានបោះឆ្នោតគាំទ្រ។
នៅ សភាជាន់ខ្ពស់អាម៉េរិក បក្សប្រជាធិបតេយ្យកាន់កាប់តែ ៥០ កៅអីប៉ុណ្ណោះ ហើយត្រូវការសន្លឹកឆ្នោតគាំទ្រពីបក្សសាធារណរដ្ឋ ចំនួន ១០ សំឡេងទៀត ដើម្បីអាចយកសេចក្ដីព្រាងច្បាប់នេះ ឡើងទៅពិនិត្យ។
សភាអាម៉េរិក កាលពីឆ្នាំ ១៩៩៤ បានអនុម័តច្បាប់ហាមឃាត់រយៈពេល ១០ ឆ្នាំ ចំពោះកាំភ្លើងវែងវាយប្រហារ និងបង់ដាក់គ្រាប់ប្រភេទធំ។ ក៏ប៉ុន្តែ បទបញ្ជានេះត្រូវអស់សុពលភាពកាលពីឆ្នាំ ២០០៤ នាំឱ្យការលក់អាវុធប្រភេទនេះកើនឡើងយ៉ាងគំហុកចាប់ពីពេលនោះមក។