មន្ទីរបញ្ចកោណ កាលពីថ្ងៃទី ១៣ កក្កដាបានឱ្យដឹងថា សហរដ្ឋអាម៉េរិក ទទួលបានជោគជ័យក្នុងការសាកល្បងមីស៊ីលល្បឿនលឿនជាងសំឡេងកម្រិត «Hypersonic» របស់ក្រុមហ៊ុន Lockheed Martin Corp។
យោងតាម Reuters ទ័ពអាកាសអាម៉េរិក បញ្ជាក់ថា ពួកគេបានទទួលជោគជ័យក្នុងការពិសោធអាវុធប្រតិកម្មរហ័សនេះដោយបាញ់ចេញពីយន្តហោះ (ARRW) នៅលើសមុទ្រ California។ មីស៊ីល នេះត្រូវបានបំពាក់លើយន្តហោះ B-52H មុនពេលបាញ់សាកល្បង។ ក្នុងការសាកល្បងបរាជ័យមុនៗ អាវុធនេះមិនអាចផ្ដាច់ខ្លួនចេញពីយន្តហោះ។
ការសាកល្បងនេះត្រូវបានធ្វើឡើងក្នុងគ្រាដែល សហរដ្ឋអាម៉េរិក កំពុងបារម្ភថា រុស្ស៊ី និង ចិន មានជោគជ័យជាងនៅក្នុងការអភិវឌ្ឍអាវុធល្បឿនលឿនជាងសំឡេងប្រភេទ Hypersonic។
មីស៊ីលប្រភេទ Hypersonic មានល្បឿនលឿនជាងសំឡេងយ៉ាងតិច ៥ ដង ពោលគឺប្រហែល ៦,២០០ គីឡូម៉ែត្រ/ម៉ោង។ ចំណែកមីស៊ីលដែលលឿនជាងសំឡេងចាប់ពី ១ ដល់ ៥ ដង ត្រូវបានគេហៅថា «Supersonic» រីឯមីស៊ីលដែលធ្វើដំណើរយឺតជាងសំឡេង ត្រូវបានគេហៅថា «Subsonic»៕