មន្ត្រីជាន់ខ្ពស់យោធារបស់ ស្រីលង្កា ទើបតែបានអំពាវនាវឱ្យប្រជាពលរដ្ឋទាំងអស់របស់ប្រទេសនេះ ជួយដល់កងកម្លាំងប្រដាប់អាវុធដើម្បីការពារច្បាប់ និងសណ្ដាប់ធ្នាប់ ក្នុងស្ថានការណ៍ដែល ស្រីលង្កា កំពុងជួបវិបត្តិសង្គមដ៏ធ្ងន់ធ្ងរ។
កាលពីថ្ងៃទី ១៣ កក្កដា សេនាប្រមុខ Sarath Fonseka បានអំពាវនាវឱ្យកងកម្លាំងសន្តិសុខ កុំអនុវត្តតាមបទបញ្ជារំលោភរដ្ឋធម្មនុញ្ញ និងខុសច្បាប់ ដែលបញ្ជាដោយប្រធានាធិបតីស្ដីទី Ranil Wickremesinghe។ នៅក្នុងប្រកាសមួយ លោក Sarath Fonseka និយាយថា មានពាក្យចចាមអារ៉ាមថា កម្លាំងសន្តិសុខទទួលបានបញ្ជាឱ្យបាញ់ប្រហារដើម្បីទប់ទល់នឹងបាតុករ។
ប្រការនេះអាចបង្កឱ្យមានអំពើហិង្សារវាងប្រជាពលរដ្ឋ និងកងកម្លាំងសន្តិសុខ។ លោក Sarath Fonseka បានជំរុញឱ្យកងកម្លាំងប្រដាប់អាវុធ រក្សាខ្លួនជាកងកម្លាំងដែលមានវិន័យ និងគោរពច្បាប់ មិនបាញ់ប្រហារលើប្រជាពលរដ្ឋដែលមិនមានអាវុធ។
ចំណែកមេដឹកនាំបក្សនានានៅ ស្រីលង្កា ក៏បានសម្រេចចិត្តស្នើឱ្យប្រធានាធិបតីស្ដីទី Ranil Wickemesinghe លាលែងពីតំណែង និងអនុញ្ញាតឱ្យប្រធានសភា Mahinda Yapa Abeywardena ឡើងដឹកនាំប្រទេសរហូតដល់ថ្ងៃទី ២០ កក្កដា នៅពេលសភាបោះឆ្នោតជ្រើសតាំងប្រធានាធិបតីថ្មី។
សកម្មភាពរបស់ក្រុមប្រឆាំងត្រូវបានធ្វើឡើងនៅពេលប្រធានាធិបតី Gotabaya Rajapaksa បានចុះហត្ថលេខាលាលែងពីតំណែង និងបានចាកចេញពីប្រទេស ដោយប្រគល់អំណាចឱ្យ នាយករដ្ឋមន្ត្រី Ranil Wickremesinghe។
កាលពីម្សិលមិញ ប្រធានាធិបតីស្ដីទី Wickremesinghe បានប្រកាសដាក់ប្រទេសក្នុងភាពអាសន្ន និងបានស្នើឱ្យកងកម្លាំងប្រដាប់អាវុធ និងប៉ូលិស ចាប់ផ្ដើមស្ដារសណ្ដាប់ធ្នាប់ និងគ្រប់គ្រងស្ថានការណ៍ឡើងវិញ៕