ជនសង្ស័យ Yamagami បានបាញ់សាកល្បងទៅលើទីតាំងសាសនាដែលជននេះស្អប់ មួយថ្ងៃមុនការធ្វើឃាត អតីតនាយករដ្ឋមន្ត្រីជប៉ុន លោក ស្ហ៊ីនហ្សូ អាបេ។
«ខ្ញុំបានបាញ់ទៅលើទីតាំងសាសនាមួយនៅក្នុងខេត្ត Nara កាលពីវេលាទាបភ្លើង ថ្ងៃទី ៧ កក្កដា» ជនសង្ស័យ Tetsuya Yamagami អាយុ ៤១ ឆ្នាំ បានសារភាពប្រាប់ក្រុមអ្នកស៊ើបអង្កេត និងប៉ូលិសខេត្ត Nara កាលពីថ្ងៃទី ១១ កក្កដាដូច្នេះ។
យោងតាមប៉ូលិស កាមេរ៉ាសន្តិសុខថតបានរូបភាពរថយន្តមួយគ្រឿងដែលដូចទៅនឹងរថយន្តរបស់ជនសង្ស័យដែលសមត្ថកិច្ចឃាត់បាន កាលពីព្រឹកថ្ងៃទី ៧ កក្កដា។ ប៉ូលិសជឿថា Yamagami ពេលនោះកំពុងតែពិសោធកាំភ្លើងដែលខ្លួនបានកែច្នៃ។
Yamagami សារភាពថា ខ្លួនស្អប់ក្រុមសាសនាមួយនោះ ហើយមានបំណងធ្វើឃាតលោក អាបេ ដោយសារតែមានទំនាក់ទំនងជាមួយក្រុមសាសនានោះ។
ប្រជាជនរស់នៅក្បែរទីតាំងសាសនាមួយនោះ ដែលស្ថិតក្នុងទីក្រុង Nara និយាយថា ពួកគេឮសំឡេងផ្ទុះនៅវេលាម៉ោងប្រហែល ៤ ថ្ងៃទី ៧ កក្កដា។
ទីតាំងសាសនានោះស្ថិតនៅចម្ងាយប្រហែល ១ គីឡូម៉ែត្រពីផ្ទះរបស់ជនសង្ស័យ។ ប៉ូលិសបានរកឃើញវត្ថុតាំងមួយចំនួននៅក្នុងរថយន្តរបស់ Yamagami។ នៅពេលត្រូវបានសួរ ជនសង្ស័យឆ្លើយថា វត្ថុទាំងនោះត្រូវបានប្រើប្រាស់ដើម្បីធ្វើតេស្តកាំភ្លើង។
ជនសង្ស័យ Yamagami អតីតសមាជិកនៃកងកម្លាំងការពារដែនសមុទ្រជប៉ុន បានធ្វើឃាត អតីតនាយករដ្ឋមន្ត្រីជប៉ុន លោក ស្ហ៊ីនហ្សូ អាបី កាលពីថ្ងៃទី ៨ កក្កដា។ ជននេះនិយាយថា ម្ដាយរបស់ខ្លួនបានចូលរួមជាមួយអង្គការសាសនាដែលខ្លួនស្អប់ និងត្រូវបានពួកគេធ្វើឱ្យអស់ទ្រព្យសម្បត្តិ។
សាច់ញាតិបានប្រាប់ថា Yamagami «ចងគំនុំជាយូរមកហើយ» ចំពោះអង្គការសាសនានោះ។ ប្រភពព័ត៌មានមួយចំនួននិយាយថា ដំបូងឡើយ ជនសង្ស័យមានបំណងធ្វើឃាតមេដឹកនាំសាសនានោះ ប៉ុន្តែ បានបោះបង់ទៅវិញដោយសារ «ពិបាក»។
សមត្ថកិច្ចមិនទាន់បញ្ជាក់ថា អង្គការសាសនានោះគឺជាអ្វី ប៉ុន្តែ សារព័ត៌មានមួយចំនួនសុទ្ធតែផ្ដោតទៅលើ Unification Church។ នេះគឺជាក្រុមគ្រីស្ទសាសនិកដ៏ល្បីឈ្មោះ ទាក់ទងនឹងពិធីរៀបការជាក្រុម និងតែងតែប្រឹងប្រែងដើម្បីកសាងទំនាក់ទំនងជាមួយបណ្ដាបក្សនយោបាយអភិរក្សនិយមនៅលើពិភពលោក។
ប្រធានអង្គការ Unification Church សាខានៅ ជប៉ុន លោក Tomihiro Tanaka កាលពីថ្ងៃទី ១១ កក្កដា បានបញ្ជាក់ថា ម្ដាយរបស់ជនសង្ស័យគឺជា «សមាជិកយូរឆ្នាំ» របស់អង្គការនេះ។ លោក Tanaka ថ្លែងថា Yamagami មិនមែនជាសមាជិករបស់ក្រុមសាសនានេះ ហើយ Unification Church ក៏មិនមានទំនាក់ទំនងអ្វីជាមួយ អតីតនាយករដ្ឋមន្ត្រី អាបេ នោះដែរ។
សមត្ថកិច្ចជឿថា Yamagami បានរៀបផែនការធ្វើឃាតលោក អាបេ យ៉ាងហោចក៏តាំងតែពីជាង ១ ឆ្នាំមុន ព្រោះជននេះបានប្រាប់ក្រុមអ្នកស៊ើបអង្កេតថា ខ្លួនចាប់ផ្ដើមកែច្នៃអាវុធកាលពីរដូវផ្ការីកឆ្នាំ ២០២១។ អ្នកជិតខាងម្នាក់របស់ជនសង្ស័យបាននិយាយថា ធ្លាប់បានឮសំឡេងដូចទៅនឹងការកែច្នៃឈើ ចេញពីបន្ទប់របស់ Yamagami នៅពេលយប់៕