ផ្កាយ S4716 ប្រើពេលតែ ៤ ឆ្នាំប៉ុណ្ណោះដើម្បីគោចរបាន ១ ជុំ Sagittarius A* ដែលជាប្រហោងខ្មៅយក្សមួយមានអង្កត់ផ្ចិតប្រមាណ ២៣.៥ លានគីឡូម៉ែត្រ។
ក្រុមអ្នកវិទ្យាសាស្ត្របានរកឃើញផ្កាយ S4716 ដែលមានល្បឿនលឿនជាងគេបង្អស់នេះ កំពុងគោចរជុំវិញប្រហោងខ្មៅ Sagittarius A* ដែលស្ថិតនៅចំកណ្ដាលកាឡាក់ស៊ីមីលគីវ៉េ។ ការស្រាវជ្រាវថ្មីនេះត្រូវបានផ្សាយលើទស្សនាវដ្ដី Astrophysical Journal កាលពីថ្ងៃទី ៥ កក្កដា។
ផ្កាយថ្មីដែលទើបត្រូវបានរកឃើញ និងត្រូវបានដាក់ឈ្មោះឱ្យថា S4714 នេះ ចំណាយពេលតែ ៤ ឆ្នាំប៉ុណ្ណោះ គឺវិលបាន ១ ជុំប្រហោងខ្មៅ Sagittarius A* ដោយមានល្បឿន ២៩ លានគីឡូម៉ែត្រក្នុង ១ ម៉ោង ឬ ៨,០០០ គីឡូម៉ែត្រ/វិនាទី។ គម្លាតជិតបំផុតរវាងផ្កាយ S4716 និងប្រហោងខ្មៅ Sagittarius A* គឺ ១៥០ លានគីឡូម៉ែត្រ។
គម្លាតខាងលើនេះ ឆ្ងាយជាងចម្ងាយពីផែនដីទៅព្រះអាទិត្យត្រឹមតែ ១០០ ដងប៉ុណ្ណោះ។ ព្រះអាទិត្យរបស់មនុស្សយើងវិលជុំវិញប្រហោងខ្មៅ Sagittarius A* ក្នុងរយៈចម្ងាយប្រហែល ២៥,០០០ ឆ្នាំពន្លឺ ដែល ១ ឆ្នាំពន្លឺមានចម្ងាយ ៩.៥ ពាន់លានគឺឡូម៉ែត្រ។
ផ្កាយ S4714 ស្ថិតនៅក្នុងកញ្ចុំផ្កាយដ៏ក្រាស់មួយដែលហៅថា កញ្ចុំផ្កាយ S កំពុងវិលជុំវិញចំណុចកណ្ដាលរបស់កាឡាក់ស៊ីមីលគីវ៉េ និងប្រហោងខ្មៅរបស់កាឡាក់ស៊ីនេះ។ ផ្កាយទាំងអស់របស់កញ្ចុំផ្កាយនេះ គោចរក្នុងល្បឿនមហាលឿន ប៉ុន្តែកម្រិតពន្លឺ និងទំហំមានភាពខុសគ្នា។
Florian Peissker តារារូបវិទូនៅសាកលវិទ្យាល័យ Cologne (អាល្លឺម៉ង់) ជាសមាជិកក្រុមស្រាវជ្រាវដែលបានរកឃើញផ្កាយ S4714 បានឱ្យដឹងថា «ការរកឃើញផ្កាយ ១ ដួងដែលគោចរទៅតាមគន្លងស្ថិរភាព និងយ៉ាងលឿននៅក្នុងតំបន់ក្បែរប្រហោងខ្មៅយក្សបែបនេះគឺជារឿងដែលគួរឱ្យភ្ញាក់ផ្អើលបំផុត»៕
