ករណីអំពើហិង្សាទាក់ទិននឹងកាំភ្លើងនៅ សហរដ្ឋអាម៉េរិក បានកើនឡើងគួរឱ្យបារម្ភ នៅក្នុងថ្ងៃបុណ្យឯករាជ្យ ៤ កក្កដា កាលពីចុងសប្ដាហ៍កន្លង ដោយវាបានសម្លាប់មនុស្សយ៉ាងតិច ២២០ នាក់ និងបង្ករបួសដល់មនុស្សជិត ៥៧០ នាក់។
ទិន្នន័យរបស់ Gun Violence Archive ដែលជាអង្គការក្រៅរដ្ឋាភិបាល មានជំនាញក្នុងការតាមដានករណីហិង្សាពាក់ព័ន្ធនឹងកាំភ្លើងនៅ សហរដ្ឋអាម៉េរិក បានបង្ហាញថា ក្នុងថ្ងៃឈប់សម្រាកចាប់ពីថ្ងៃទី ១ ដល់ ៤ កក្កដានៃទិវាបុណ្យឯករាជ្យកន្លងទៅ នៅក្នុងរដ្ឋស្ទើរតែទាំងអស់របស់ សហរដ្ឋអាម៉េរិក បានកើតមានហេតុការណ៍បាញ់ប្រហារដោយប្រើប្រាស់កាំភ្លើងចំនួនជាង ៥០០ ករណី ក្នុងនោះក៏មាន ១១ ករណីដែលជាអំពើបាញ់រះលើហ្វូងមនុស្ស។ មានរដ្ឋចំនួនតែ ៥ ប៉ុណ្ណោះ ដែលមិនមានករណីបាញ់ប្រហារនៅក្នុងរដូវបុណ្យនេះ។
ចាប់តាំងពីដើមឆ្នាំ ២០២២ រហូតដល់បច្ចុប្បន្ន មានអំពើបាញ់រះចំនួន ៣១៥ ករណី នៅទូទាំង សហរដ្ឋអាម៉េរិក បណ្ដាលឱ្យមនុស្សប្រហែល ២២,៥០០ នាក់បាត់បង់ជីវិត។ សហរដ្ឋអាម៉េរិក ចាត់ទុកអំពើបាញ់ប្រហារដែលបណ្ដាលឱ្យមានមនុស្សយ៉ាងតិច ៤ នាក់ស្លាប់ ឬរបួស ថាជាអំពើបាញ់រះ។
ករណីហិង្សានៅក្នុងឱកាសបុណ្យឯករាជ្យអាម៉េរិក ៤ កក្កដា មិនមែនជារឿងកម្រនោះទេនៅក្នុងប៉ុន្មានឆ្នាំចុងក្រោយនេះ។ ឆ្នាំ ២០២១ មានមនុស្សជាង ១៨០ បានស្លាប់ និង ៥១៦ នាក់រងរបួសនៅក្នុងករណីបាញ់ប្រហារក្នុងរដូវបុណ្យឯករាជ្យនេះ។
សាធារណជនអាម៉េរិក កំពុងយកចិត្តទុកដាក់ខ្លាំងលើបញ្ហាប្រើប្រាស់កាំភ្លើង។ កាលពីថ្ងៃទ ២៤ ឧសភា មានករណីបាញ់រះមួយបានកើតឡើងនៅឯសាលាបឋមសិក្សា Robb ក្នុងតំបន់ Uvalde នៃរដ្ឋ Texas បានបណ្ដាលឱ្យក្មេងចំនួន ១៩ នាក់ និងមនុស្សពេញវ័យ ២ នាក់ បាត់បង់ជីវិត។
ក្រោយកើតមានអំពើបាញ់រះនេះ សមាជិកសភាអាម៉េរិក បានជំរុញឱ្យអនុម័តលើសេចក្ដីព្រាងច្បាប់ «ដើម្បីសហគមន៍មានសុវត្ថិភាពជាងមុន» បំណងរឹតបន្តឹងការគ្រប់គ្រងអាវុធ។ កាលពីថ្ងៃទី ២៥ មិថុនា ប្រធានាធិបតីអាម៉េរិក ចូ បៃដិន បានចុះហត្ថលេខាអនុម័តលើច្បាប់នេះ។
នេះគឺជាការប្រឹងប្រែងថ្មី និងសំខាន់បំផុតរបស់ រដ្ឋាភិបាលអាម៉េរិក ក្នុងការដោះស្រាយអំពើហិង្សាពាក់ទ័ន្ធនឹងកាំភ្លើងនៅ សហរដ្ឋអាម៉េរិក រាប់ចាប់តាំងពីបទបញ្ជាហាមប្រើប្រាស់អាវុធដែលមានសុពលភាព ១០ ឆ្នាំ បានអស់សុពលភាពកាលពីឆ្នាំ ១៩៩៤៕
