មេដឹកនាំកំពូលរបស់ តាលីបង់ ដែលជាក្រុមប្រដាប់អាវុធកំពុងគ្រប់គ្រង ប្រទេសអាហ្វហ្គានីស្ថាន ព្រមានពិភពលោក កុំឱ្យជ្រៀតជ្រែកកិច្ចការផ្ទៃក្នុងរបស់ពួកគេ និងអះអាងថា ច្បាប់ Sharia គឺជាជម្រើសសមស្របបំផុត។
«ហេតុអ្វីពិភពលោកបែរជាជ្រៀតជ្រែកចូលក្នុងបញ្ហារបស់យើង? ពួកគេនិយាយថា «ហេតុអ្វីពួកលោកមិនធ្វើនេះ មិនធ្វើនោះ?»» មេដឹកនាំកំពូលរបស់ តាលីបង់ Hibatullah Akhundzada និយាយនៅក្នុងសេចក្ដីថ្លែងការណ៍មួយដែលត្រូវបានចាក់ផ្សាយលើវិទ្យុជាតិអាហ្វហ្គានីស្ថាន កាលពីថ្ងៃទី ១ កក្កដា។
មេដឹកនាំកំពូលតាលីបង់ ដែលមិនធ្លាប់បានបង្ហាញខ្លួននៅទីសាធារណៈចាប់តាំងពីក្រុមនេះដណ្ដើមបានអំណាចនៅ អាហ្វហ្គានីស្ថាន កាលពីខែសីហា ២០២១ ត្រូវបានគេជឿថា បានចូលរួមកិច្ចប្រជុំមួយដែលមានអាចារ្យ ឬអ្នកបួសប្រហែល ៣,០០០ នាក់ នៅ រដ្ឋធានីកាប៊ុល។ កិច្ចប្រជុំនេះត្រូវបានធ្វើឡើងពីថ្ងៃទី ៣០ មិថុនា ដល់ថ្ងៃទី ២ កក្កដា។
វត្តមានរបស់លោក Akhundzada នៅក្នុងកិច្ចប្រជុំនេះ ត្រូវបានសាទរដោយការស្រែកហ៊ោថា «រដ្ឋអេមីរ៉ាតអ៊ិស្លាមអាហ្វហ្គានីស្ថានម៉ឺនឆ្នាំ»។ នេះគឺជាឈ្មោះផ្លូវការរបស់ រដ្ឋអាហ្វហ្គានីស្ថាន ក្រោមការដឹកនាំរបស់ក្រុមតាលីបង់។
ប្រភពព័ត៌មានឱ្យដឹងថា អ្នកដែលចូលរួមកិច្ចប្រជុំខាងលើនោះ សុទ្ធតែជាបុរស។ ពួកគេក៏បានពិភាក្សាអំពីបញ្ហាទាក់ទិននឹងការអប់រំក្មេងស្រីផងដែរ។
ចាប់តាំងពីបានឡើងកាន់អំណាចកាលពីខែសីហាឆ្នាំកន្លង តាលីបង់ បានរឹតបន្តឹងយ៉ាងខ្លាំងចំពោះសិទ្ធិមូលដ្ឋានរបស់ស្ត្រី។ កាលពីខែឧសភា តាលីបង់ បានអនុម័តបទបញ្ជាមួយដែលណែនាំឱ្យស្ត្រីនៅផ្ទះ និងត្រូវបិទបាំងមុខបើសិនចេញទីសាធារណៈ។
មុននោះ តាលីបង់ ក៏ធ្វើឱ្យមានការចាប់អារម្មណ៍ផងដែរ នៅពេលហាមស្ត្រីជិះយន្តហោះដោយមិនមានបុរសទៅជាមួយ។ ទន្ទឹមនឹងនេះ ពួកគេក៏ស្នើឱ្យឧទ្យាននានាបើកទ្វារសម្រាប់ស្ត្រី និងបុរស ដាច់ដោយឡែកពីគ្នា បូករួមទាំងប្ដីប្រពន្ធផងដែរ។ តាលីបង់ ក៏បាន «ក្បត់» ពាក្យសន្យាដែលមុននោះពួកគេនិយាយថា នឹងបើកសាលារៀនសម្រាប់សិស្សស្រី។
ប៉ុន្តែ តាលីបង់ បានបញ្ជាក់ថា ពួកគេបានប្ដូរផ្លាស់ធៀបនឹងអំឡុងពេលកាន់អំណាចកាលពីជាង ២០ ឆ្នាំមុន។ កាលណោះ ពួកគេហាមស្ត្រីរៀនសូត្រ ទៅធ្វើការ ឬចេញពីផ្ទះ បើមិនមានបុរសអមដំណើរ។
តាលីបង់ ក៏បានអះអាងថា កំពុងតែអនុវត្តច្បាប់ដែលអនុញ្ញាតឱ្យស្ត្រីទទួលផលប្រយោជន៍ទៅតាមច្បាប់សាសនាអ៊ិស្លាម និងវប្បធម៌របស់ អាហ្វហ្កានីស្ថាន។ ក៏ប៉ុន្តែ ការកំណត់ដ៏តឹងរឹងនាពេលថ្មីៗនេះ បានធ្វើឱ្យតាលីបង់ ត្រូវរងការរិះគន់យ៉ាងខ្លាំងក្លា អមជាមួយនឹងការមន្ទិលសង្ស័យពីសហគមន៍អន្តរជាតិ៕
