កាលពីថ្ងៃទី ៣០ មិថុនា អគ្គលេខាធិការនៃអង្គការសន្ធិសញ្ញាអាត្លង់ទិកខាងជើង (NATO) បានប្រកាសថា ពិធីសារចូលជាសមាជិកសម្ព័ន្ធមិត្តយោធាណាតូ របស់ ប្រទេសហ្វាំងឡង់ និង ស៊ុយអែត នឹងត្រូវបានចុះហត្ថលេខានៅសប្ដាហ៍ក្រោយ។
លោក Jens Stoltenberg អគ្គលេខាធិការនៃអង្គការណាតូ ឱ្យដឹងថា សេចក្ដីសម្រេចផ្លូវការស្ដីពីការអញ្ជើញ ហ្វាំងឡង់ និង ស៊ុយអែត ចូលជាសមាជិករបស់ ណាតូ ត្រូវបានលើកឡើងនៅក្នុងកិច្ចប្រជុំកំពូលរបស់ សម្ព័ន្ធមិត្តយោធានេះកាលពីថ្ងៃទី ៣០ មិថុនា។
ណាតូ នឹងចុះហត្ថលេខាជាផ្លូវការលើពិធីសារចូលជាសមាជិករបស់ប្រទេសទាំងពីរនៅក្នុងថ្ងៃទី ៥ កក្កដា ដោយមានវត្តមានរបស់ រដ្ឋមន្ត្រីក្រសួងការបរទេសនៃ ប្រទេសហ្វាំងឡង់ និង ប្រទេសស៊ុយអែត។
លោក Jens Stoltenberg ក៏បានបន្ថែមថា សន្និបាតកំពូលរបស់ ណាតូ លើកនេះ បានអនុម័តលើ «និយមន័យនៃយុទ្ធសាស្ត្រថ្មី» ហើយបណ្ដាសមាជិករបស់ ណាតូ ក៏មានផែនការគាំទ្រ និងការពារចំពោះការដឹកជញ្ជូនធញ្ញជាតិចេញពី ប្រទេសអ៊ុយក្រែន តាមផ្លូវគោក និងផ្លូវទឹកផងដែរ។
អគ្គលេខាធិការនៃអង្គការណាតូ ឱ្យដឹងថា លោកសង្ឃឹមថា កងទ័ពរុស្ស៊ី នឹងដកថយពី អ៊ុយក្រែន កាន់តែឆាប់កាន់តែល្អ ដើម្បីបញ្ចប់សង្គ្រាម ហើយថា ណាតូ បានត្រៀមរួចរាល់ហើយសម្រាប់ទប់ទល់នឹងសកម្មភាពទាំងឡាយណាដែលអាចត្រូវបាន រុស្ស៊ី ធ្វើឡើងនាពេលខាងមុខ៕
