ក្រសួងហិរញ្ញវត្ថុអាម៉េរិក បានឱ្យដឹងថា ក្រុមបេសកជនអន្តររដ្ឋាភិបាល REPO បានបង្កកទ្រព្យសម្បត្តិចំនួន ៣០ ពាន់លានដុល្លាររបស់ ក្រុមអ្នកមានរុស្ស៊ី នៅក្នុងរយៈពេល ១០០ ថ្ងៃដំបូងនៃការបំពេញការងារ។
«យើងនឹងបន្តបង្កើនតម្លៃដែល រុស្ស៊ី ត្រូវបង់សម្រាប់យុទ្ធនាការយោធារបស់ពួកគេ» ក្រសួងហិរញ្ញវត្ថុអាម៉េរិក ប្រកាសកាលពីថ្ងៃទី ២៩ មិថុនា ២០២២ ស្ដីពីសកម្មភាពរបស់ REPO ដែលរួមមាន សហរដ្ឋអាម៉េរិក, សហភាពអឺរ៉ុប, អង់គ្លេស, អូស្ត្រាលី, កាណាដា, អាល្លឺម៉ង, បារាំង, អ៊ីតាលី និង ជប៉ុន។
REPO ដែលត្រូវបានបង្កើតឡើងកាលពីខែមិនា ទទួលខុសត្រូវក្នុងការអនុវត្តបទបញ្ជាដាក់ទណ្ឌកម្មសំដៅលើក្រុមអ្នកមានអំណាច និងមហាសេដ្ឋីរបស់ រុស្ស៊ី។
ក្រសួងហិរញ្ញវត្ថុអាម៉េរិក ឱ្យដឹងថា ក្នុងការអនុវត្តបទបញ្ជាក្នុងរយៈ ១០០ ថ្ងៃដំបូង REPO បានបង្កកទ្រព្យចំនួន ៣០ ពាន់លានដុល្លារអាម៉េរិក របស់ ក្រុមអ្នកមានរុស្ស៊ី ដោយការរឹបអូសយកនាវាទេសចរណ៍ និងអចលនទ្រព្យរបស់ពួកគេជាដើម។ ប្រាក់ចំនួន ៣០០ ពាន់លានដុល្លារនៅក្នុងបណ្ដាមូលនិធិធនាគារកណ្ដាលរុស្ស៊ី ក៏ត្រូវបានបង្កក។
«សមាជិកនានារបស់ REPO នឹងបន្តតាមដានទ្រព្យសម្បត្តិរបស់ រុស្ស៊ី ដែលត្រូវជាប់ក្នុងទណ្ឌកម្ម» ក្រសួងហិរញ្ញវត្ថុអាម៉េរិក សង្កត់ធ្ងន់ដូច្នេះ។
ការបង្កក ឬការរឹបអូសយកទ្រព្យសម្បត្តិរបស់ ក្រុមអ្នកមានអំណាច និងមូលនិធិធនាគារនានារបស់ រុស្ស៊ី ត្រូវបានធ្វើឡើងទៅតាមបទបញ្ជាដាក់ទណ្ឌកម្មលើ ទីក្រុងមូស្គូ ដើម្បីឆ្លើយតបនឹងទង្វើឈ្លានពានរបស់ កងទ័ពប្រទេសនេះ ទៅលើ អ៊ុយក្រែន។
ក៏ប៉ុន្តែ ក្រុមអ្នកជំនាញមានការព្រួយបារម្ភថា សកម្មភាពខាងលើនេះអាចបំពានលើគោលការណ៍ច្បាប់ និងនាំឱ្យមានករណីប្ដឹងតវ៉ាស្មុគស្មាញ។ រដ្ឋាភិបាលទីក្រុងកៀវ កាលពីដើមខែនេះបានគណនាឃើញថា អ៊ុយក្រែន បានខូចខាតបាត់បង់ទ្រព្យសម្បត្តិអស់ ៦០០ ពាន់លានដុល្លារអាម៉េរិក ដោយសារតែសង្គ្រាម៕
