ក្រុមហ៊ុនវាយតម្លៃឥណទាន Fitch បានអះអាងថា ប្រទេសស្លូវ៉ាគី, ហុងគ្រី និង សាធារណរដ្ឋឆែក នឹងជាប្រទេសដែលត្រូវរងផលប៉ះពាល់ធ្ងន់ធ្ងន់ជាងគេ បើសិន រុស្ស៊ី កាត់ផ្ដាច់ប្រភពផ្គត់ផ្គង់ប្រេងឧស្ម័ន។
របាយការណ៍របស់ Fitch ដែលបានប្រកាសកាលពីថ្ងៃទី ២៨ មិថុនា ក៏បានឱ្យដឹងថា សហភាពអឺរ៉ុប (EU) ត្រូវការពេល ៣ ឆ្នាំ ទើបអាចមានប្រភពមកជំនួសប្រេងឧស្ម័នដែលនាំចូលពី ប្រទេសរុស្ស៊ី ក្នុងករណី ទីក្រុងមូស្គូ កាត់ផ្ដាច់ប្រភពផ្គត់ផ្គង់ភ្លាម។
Fitch បានព្រមានថា ការដែល រុស្ស៊ី មាន «ភាពរអាក់រអួល» ក្នុងការផ្គត់ផ្គង់ប្រេងឧស្ម័ន ក៏នឹងធ្វើឱ្យបណ្ដាប្រទេសនៅ អឺរ៉ុប ប្រឈមនឹងផលប៉ះពាល់ធ្ងន់ធ្ងន់ ពិសេសគឺ កំណើនសេដ្ឋកិច្ចដាំក្បាលចុះ និងអតិផរណាកើនឡើងខ្ពស់។
ក្រុមហ៊ុនវាយតម្លៃឥណទានខាងលើក៏យល់ថា ស្លូវ៉ាគី, ហុងគ្រី និង សាធារណរដ្ឋឆែក គឺជាប្រទេសដែលងាយរងគ្រោះបំផុត ដោយសារតែពឹងផ្អែកច្រើនទៅលើឧស្ម័នដែលនាំចូលពី ប្រទេសរុស្ស៊ី និងពុំមានប្រភពផ្គត់ផ្គង់បម្រុង។ ចំណែក ប៉ូឡូញ, លីទុយអានី និង រូម៉ានី អាចមានសុវត្ថិភាពច្រើនជាង ព្រោះតែបានចាប់យកប្រភពផ្គត់ផ្គង់ជំនួស ឬមានលទ្ធភាពផលិតក្នុងស្រុក។
កាលពីខែមេសា ក្រុមហ៊ុន Gazprom របស់ រុស្ស៊ី បានផ្អាកការផ្គត់ផ្គង់ឧស្ម័នដល់ ប៊ុលហ្គារី, ប៉ូឡូញ និង ហ្វាំងឡង់ បន្ទាប់ពីប្រទេសទាំងនេះមិនព្រមទូទាត់ដោយប្រើប្រាស់ប្រាក់ រូប្លរុស្ស៊ី ទៅតាមសំណើរបស់ ទីក្រុងមូស្គូ។ កាលពីដើមខែនេះ ក្រុមហ៊ុន Gazprom ក៏បានកាត់បន្ថយឧស្ម័ន ៦០% ដែលក្រុមហ៊ុនផ្គត់ផ្គង់ទៅឱ្យ ប្រទេសអាល្លឺម៉ង់ តាមបំពង់បង្ហូរ Nord Stream។ ប្រការនេះធ្វើឱ្យមានការព្រួយបារម្ភខ្លាំងសម្រាប់ តំបន់អឺរ៉ុប។
ចំពោះ រុស្ស៊ី វិញ វិមានក្រឹមឡាំង បានប្រកាសថា នឹងប្រឹងប្រែងរក្សាតំណែងជា «អ្នកផ្គត់ផ្គង់ឧស្ម័នដែលគួរជាទីទុកចិត្ត» និងបានច្រាលចោលព័ត៌មានដែលថា ប្រទេសនេះនឹងកាត់ផ្ដាច់ទាំងស្រុងនូវការផ្គត់ផ្គង់ឧស្ម័នដល់ អឺរ៉ុប៕
