ប៉ូលិសការពារដែនសមុទ្រតៃវ៉ាន់ បង្កើតតំបន់ហាមឃាត់ទូក កប៉ាល់ និងបានធ្វើសមយុទ្ធបាញ់គ្រាប់ពិតនៅលើកោះ Taiping ក្នុងប្រជុំកោះ Spratly លើ សមុទ្រចិនខាងត្បូង ធ្វើឱ្យ វៀតណាម «ស្រែក» ថា ខុសច្បាប់ និងរំលោភលើអធិបតេយ្យភាពទឹកដីរបស់ពួកគេ។
អាជ្ញាធរការពារដែនសមុទ្ររបស់ តៃវ៉ាន់ បានប្រកាសធ្វើសមយុទ្ធចាប់ពីថ្ងៃទី ២៨ ដល់ ២៩ មិថុនា ដោយមានវិញ្ញាសាបាញ់គ្រាប់ពិតសំដៅលើគោលដៅក្នុងដែនអាកាស និងនៅលើដែនទឹក។ យន្តហោះ និងទូក កប៉ាល់ ត្រូវបានស្នើឱ្យគេចពីតំបន់នេះនៅក្នុងពេលកំពុងធ្វើសមយុទ្ធ។
សមយុទ្ធរបស់ តៃវ៉ាន់ នេះ ធ្វើឱ្យ អាជ្ញាធរវៀតណាម «កើតទុក្ខមិនសុខចិត្ត» និងប្រកាសថា នេះជាសម្មភាពខុសច្បាប់។ អាជ្ញាធរវៀតណាម កន្លងមកធ្លាប់បានស្នើជាច្រើនលើក ឱ្យ តៃវ៉ាន់ បញ្ឈប់សកម្មភាពសមយុទ្ធនៅលើកោះ Taiping ដែល វៀតណាម ហៅថា កោះ Ba Binh និងដែនទឹកនៅជុំវិញ ដោយចាត់ទុកថា ជាការរំលោភលើអធិបតេយ្យភាពទឹកដីរបស់ពួកគេ គំរាមកំហែកសន្តិភាព ស្ថិរភាព សុវត្ថិភាព សន្តិសុខដែនទឹក បង្កភាពតានតឹង និងស្មុគស្មាញបន្ថែមទៀតនៅលើ សមុទ្រចិនខាងត្បូង។
កោះ Taiping គឺកោះដែលមានផ្ទៃក្រឡាធម្មជាតិធំជាងគេបង្អស់នៅក្នុងប្រជុំកោះ Spratly ដែល វៀតណាម ប្រកាសថាជាកម្មសិទ្ធិរបស់ខ្លួន។ វៀតណាម អះអាងថា ពួកគេមានមូលដ្ឋានច្បាប់ និងភ័ស្ដុតាងប្រវត្តិសាស្ត្រគ្រប់គ្រាន់ដែលបញ្ជាក់បានថា ប្រជុំកោះ Spratly និង ប្រជុំកោះ Paracel នៅ សមុទ្រចិនខាងត្បូង គឺជាទឹកដីរបស់ពួកគេ៕
