មន្ត្រីមួយរូបរបស់ខេត្ត Kherson បានប្រកាសថា តំបន់នេះកំពុងត្រៀមខ្លួនដើម្បីធ្វើប្រជាមតិស្ដីពីការបង្រួបបង្រួមជាមួយ រុស្ស៊ី ក្នុងពេលដ៏ខ្លីខាងមុខ។
លោក Kirill Stremousov អនុប្រធាននៃ «អាជ្ញាធរយោធា-ស៊ីវិល» ដែលត្រូវបានលើកបន្តុបដោយ រុស្ស៊ី នៅ Kherson នៃ ប្រទេសអ៊ុយក្រែន ថ្ងៃនេះ (២៩ មិថុនា) បានឱ្យដឹងថា អាជ្ញាធរនៅក្នុងតំបន់នេះ បានចាប់ផ្ដើមត្រៀមសម្រាប់ការធ្វើប្រជាមតិស្ដីពីការច្របាច់បញ្ចូល Kherson ទៅក្នុង សហព័ន្ធរុស្ស៊ី។
«តំបន់ Kherson នឹងសម្រេចចិត្តក្នុងការច្របាច់បញ្ចូលទៅក្នុង សហព័ន្ធរុស្ស៊ី និងក្លាយជាស្ថាប័នផ្លូវការមួយ ដែលដូចទៅនឹងប្រទេសឯករាជ្យ» លោក Stremousov និយាយនៅក្នុងវីដេអូមួយដែលបានបង្ហោះលើ Telegram ដូច្នេះ។
Kherson គឺជាដែនដីភាគខាងត្បូងរបស់ អ៊ុយក្រែន ជាប់នឹង ឧបទ្វីបគ្រីមៀ។ រុស្ស៊ី ដណ្ដើមបាន Kherson ពី អ៊ុយក្រែន ក្នុងដំណាក់កាលដំបូងនៃយុទ្ធនាការយោធាពិសេសរបស់ ទីក្រុងមូស្គូ។
កាលពីថ្ងៃទី ២១ មិថុនា លោក Stremousov បានប្រកាសថា Kherson នឹងធ្វើប្រជាមតិមួយនៅក្នុងឆ្នាំនេះ ក្នុងនោះ ជំហាននានាកំពុងត្រូវបានអនុវត្ត។
ទាក់ទិននឹងបញ្ហាខាងលើ វិមានក្រឹមឡាំង បានឱ្យដឹងថា ប្រជាជននៅ Kherson ត្រូវសម្រេចចិត្តថា តើចង់ចូលរួមជាមួយ រុស្ស៊ី ដែរ ឬអត់។ ក្រុមអ្នកច្បាប់របស់ រុស្ស៊ី បញ្ជាក់ថា ការធ្វើប្រជាមតិមួយអាចត្រូវបានធ្វើឡើងយ៉ាងយូរនៅខែកក្កដាខាងមុខ៕
