កងទ័ពសហរដ្ឋអាម៉េរិក បានបញ្ជូនសុនករ៉ូបូតទំនើប ទៅកាន់ អ៊ុយក្រែន ដើម្បីជួយដល់អង្គការមនុស្សធម៌មួយ នៅក្នុងដំណើរការ «រៀបចំ បោសសម្អាត» សមរភូមិនៅតាមតំបន់ជុំវិញ រដ្ឋធានីកៀវ។
យោងតាមបណ្ដាញសារព័ត៌មាន RT (រុស្ស៊ី) លោក Chris Whatley នាយកប្រតិបត្តិរបស់ HALO Trust ដែលជាអង្គការដោះ និងបំផ្លាញមីន មានមូលដ្ឋាននៅ សហរដ្ឋអាម៉េរិក បានឱ្យដឹងថា ពួកគេនឹងប្រើប្រាស់សុនកយន្ត Spot របស់ក្រុមហ៊ុន Boston Dynamics ដើម្បីដោះមីន គ្រាប់កាំភ្លើងត្បាល់ និងគ្រឿងអាវុធមិនទាន់ផ្ទុះ នៅក្នុងតំបន់ដែលធ្លាប់ត្រូវបានគ្រប់គ្រងដោយ កម្លាំងរុស្ស៊ី នៅជុំវិញ រដ្ឋធានីកៀវ។
លោក Whatley បានបង្ហើបឱ្យដឹងថា ក្នុងការសាកល្បងកាលពីឆ្នាំកន្លង សុនកយន្ត Spot បានបង្ហាញប្រសិទ្ធិខ្ពស់ក្នុងភារកិច្ចដោះមីនខ្នាតតូច ដែលងាយផ្ទុះ។
ក្នុងសារអេឡិចត្រូនិកមួយដែលបានផ្ញើទៅកាន់ Foreign Policy ប្រធានផ្នែកសារព័ត៌មាន និងទីផ្សាររបស់ក្រុមហ៊ុន Boston Dynamics បានទទួលស្គាល់ថា « Spot គឺជាឧបករណ៍ដែលមានប្រសិទ្ធភាពក្នុងការការពារមនុស្សពីការគំរាមកំហែង និងតែងត្រូវបានប្រើប្រាស់ដើម្បីគ្រប់គ្រងវត្ថុធាតុដែលអាចបង្កគ្រោះថ្នាក់»។ ក៏ប៉ុន្តែ Boston Dynamics បានលើកឡើងនូវលក្ខខណ្ឌ និងយន្តការសម្រាប់ទប់ស្កាត់ «ការធ្វើអាវុធូបនីយកម្មចំពោះរ៉ូបូត Spot ក្នុងគោលដៅបង្កគ្រោះថ្នាក់ ឬការគំរាមកំហែង»។
ភាគីខាងរុស្ស៊ី ក៏កំពុងធ្វើសកម្មភាពដោះមីននៅក្នុងបណ្ដាតំបន់របស់ Donbass។ កាលពីខែមីនា ប្រធានអង្គភាពស្ថានការណ៍បន្ទាន់របស់ក្រុមផ្ដាច់ខ្លួននៅ Donetsk បានឱ្យដឹងថា ត្រូវចំណាយពេលប្រហែល ១០ ឆ្នាំ ដើម្បីដោះមីនដែល អ៊ុយក្រែន បានបន្សល់ទុកនៅក្នុងតំបន់ដែលពួកគេកំពុងកាន់កាប់៕
