មនុស្សយ៉ាងតិច ១០ នាក់បានស្លាប់ និងជាង ២៥០ រងរបួស បន្ទាប់ពីកើតមានហេតុការណ៍ធ្លាយឧស្ម័នពុល ក្លរីន ពីកប៉ាល់ដឹកប្រេងឧស្ម័ននៅឯកំពង់ផែ Aqaba របស់ ប្រទេសហ្ស៊កដានី។
ទូរទស្សន៍ហ្ស៊កដានី កាលពីយប់ថ្ងៃទី ២៧ មិថុនា បានឱ្យដឹងថា កប៉ាល់ដឹកឧស្ម័នខាងលើបានជួបឧបទ្ទវហេតុក្នុងពេលកំពុងលើកដាក់ទំនិញ ធ្វើឱ្យធ្លាយឧស្ម័ននៅឯកំពង់ផែ Aqaba។ ហេតុការណ៍កើតឡើងបន្ទាប់ពីធុងផ្ទុកឧស្ម័នក្លរីនមួយបានធ្លាក់ពីខ្សែដងសន្ទូច និងបានផ្ទុះនៅលើកប៉ាល់ដែលកំពុងចត។
បន្ទាប់ពីបានផ្ទុះ ឧស្ម័នពណ៌លឿងក៏បានសាយភាយពាសពេញទីតាំងរបស់កប៉ាល់ និងតំបន់ជុំវិញ នាំឱ្យសមត្ថកិច្ចបិទខ្ទប់តំបន់នេះ និងជម្លៀសប្រជាជនចេញពីតំបន់គ្រោះថ្នាក់។
ប្រធានមន្ទីរពេទ្យតំបន់ Aqaba បានអំពាវនាវឱ្យប្រជាជនក្នុងតំបន់ជុំវិញកំពង់ផែ បិទទ្វារនៅក្នុងផ្ទះដើម្បីជៀសពីឧស្ម័នពុល។ នាយករដ្ឋមន្ត្រីហ្ស៊កដានី Bishr Al-Khasawneh បានទៅដល់ទីក្រុង Aqaba ក្រោយពីហេតុការណ៍បានកើតឡើង និងបានណែនាំឱ្យបង្កើតក្រុមស៊ើបអង្កេតមួយដែលដឹកនាំដោយ រដ្ឋមន្ត្រីក្រសួងមហាផ្ទៃ ដើម្បីស្វែងរកមូលហេតុនៃឧបទ្ទវហេតុនេះ។
យោងតាម អង្គការសុខភាពពិភពលោក ឧស្ម័នក្លរីន (chlorine gas) ដែលមានពណ៌លឿង មានក្លិនឆួលដូចទៅនឹងថ្នាំសម្អាតបន្ទប់ទឹក ហើយធ្ងន់ជាងខ្យល់ប្រហែល ៣ ដង និងប្រមូលផ្ដុំនៅទីទំនាប មិនបង្កជាការផ្ទុះ ប៉ុន្តែ ជួយបង្កើនសមត្ថភាពផ្ទុះរបស់វត្ថុធាតុដទៃ។ ឧស្ម័នក្លរីន អាចធ្វើឱ្យរលាកស្បែក នៅពេលស្ថិតនៅក្បែរវា ឬនៅកន្លែងដែលមានផ្សែងរបស់ឧស្ម័ននេះ។
