ហ្វូងអ្នកដំណើរដែលឈរតម្រង់ជួរគ្នានៅក្នុងបណ្ដាព្រលានយន្តហោះនៅកណ្ដាលគំនរឥវ៉ាន់ «វង្វេងម្ចាស់» បានបង្ហាញថា ភាពវឹកវរកំពុងតែកើតមានឡើងនៅក្នុងការធ្វើដំណើរនារដូវក្ដៅឆ្នាំនេះ។
ដើម្បីអាចឡើងយន្តហោះទៅកាន់ អាថែន (ក្រិក) Liz Morgan ត្រូវទៅកាន់ព្រលានយន្តហោះ Schiphol (ហូឡង់) ឆាប់ជាង ៤ ម៉ោង ធៀបនឹងពេលចេញដំណើរ ហើយត្រូវរង់ចាំយ៉ាងហត់នឿយ។
Morgan ដែលជាជនជាតិអូស្ត្រាលី បានឱ្យដឹងថា «មានទាំងមនុស្សចាស់ ក្មេង ទារកទើបកើត ឈរតម្រង់ជួរគ្នា។ មិនមានទឹក មិនមានអ្វីទាំងអស់។ មិនមានអ្នកជួយ ហើយក៏មិនអាចទៅបន្ទប់ទឹកបាន»។ Morgan ប្រាប់ថា ដើម្បីសន្សំសំច័យពេលវេលាក្នុងការបំពេញបែបបទនៅព្រលានយន្តហោះ នាងត្រូវទិញសំបុត្រតាមអនឡាញ និងយកអីវ៉ាន់ដែលអាចស្ពាយជាប់នឹងខ្លួនប៉ុណ្ណោះ។
«គ្រប់គ្នាមិនអាចទៅបន្ទប់ទឹក ហើយបើអ្នកបានចាកចេញពីជួរ អ្នកនឹងបាត់បង់កន្លែង» នារីជនជាតិអូស្ត្រាលីរូបនេះរៀបរាប់ដូច្នេះ។
ក្រោយការរឹតបន្តឹងការធ្វើដំណើររយៈពេល ២ ឆ្នាំ ដោយសារតែកូវីដ-១៩ តម្រូវការនៃការធ្វើដំណើរនាបច្ចុប្បន្ន បានកើនឡើងវិញ។ ប៉ុន្តែ ការដែលបណ្ដាក្រុមហ៊ុនអាកាសចរណ៍ និងព្រលានយន្តហោះកាត់បន្ថយបុគ្គលិកក្នុងពេលមានកូវីដ-១៩ បានធ្វើឱ្យពួកគេជួបកាលំបាកក្នុងការបម្រើសេវាកម្មនាបច្ចុប្បន្ន។ ក្នុងគ្រាដែលរដូវទេសចរណ៍នៅ អឺរ៉ុប ជិតចូលមកដល់ អ្នកដំណើរនៅតំបន់នេះកំពុងតែប្រឈមនឹងបញ្ហាជាច្រើនទាន់ទងនឹងការធ្វើដំណើរ ដូចជាបញ្ហាវង្វេងអីវ៉ាន់ ជើងហោះហើរត្រូវពន្យារពេលជាបន្តបន្ទាប់ ឬត្រូវលុបចោល។ល។
បញ្ហាទាំងឡាយខាងលើនេះ មិនត្រឹមតែកំពុងកើតឡើងនៅ អឺរ៉ុប នោះទេ ប៉ុន្តែវាក៏កំពុងចាប់ផ្ដើមកើតមាននៅ សហរដ្ឋអាម៉េរិក ផងដែរ។
