យោងតាម CNN ដែលបានចុះផ្សាយនាថ្ងៃនេះ មនុស្ស ៦ នាក់បានស្លាប់នៅក្នុងហេតុការណ៍ធ្លាក់ឧទ្ធម្ភាគចក្រទេសចរណ៍មួយគ្រឿងនៅក្នុងស្រុក Logan កាលពីព្រលប់ថ្ងៃទី ២២ មិថុនា។
នាយកដ្ឋានអាកាសចរណ៍អាម៉េរិក បានឱ្យដឹងថា ឧទ្ធម្ភាគចក្រប្រភេទ Bell UH-1B មួយគ្រឿងបានធ្លាក់នៅលើផ្លូវល្បឿនលឿនលេខ១៧ (State Route 17) នៅក្នុងស្រុក Logan នៃតំបន់ភាគនិរតីរបស់ រដ្ឋ Virginia ខាងលិច នាវេលាម៉ោងប្រហែល ១៧ ម្សិលមិញ (ម៉ោងក្នុងស្រុក)។ ឧទ្ធម្ភាគចក្រនេះបានឆាបឆេះមុនពេលក្រុមសង្គ្រោះបន្ទាន់បានទៅដល់។
បន្ទាប់ពីហេតុការណ៍ខាងលើបានកើតឡើង អភិបាលរដ្ឋ Virginia ខាងលិច លោក Jim Justice ក៏បានបង្ហោះសារចូលរួមរំលែកទុក្ខដល់គ្រួសារជនរងគ្រោះ និងបញ្ជាក់ថា នឹងប្រកាសមូលហេតុដែលនាំឱ្យកើតមានគ្រោះថ្នាក់នេះ៕
