ប្រធានាធិបតី Gitanas Nauseda បានឱ្យដឹងថា លីទុយអានី (Lithuania ឬ Litva) ត្រៀមខ្លួនរួចរាល់ហើយក្នុងការពង្រីកការបិទខ្ទប់ទីក្រុង Kaliningrad របស់ រុស្ស៊ី និងស្វាគមន៍សកម្មភាព «មិនស្និទ្ធស្នាល» ពី ភាគីទីក្រុងមូស្គូ។
«យើងបានប្រុងប្រៀប និងត្រៀមខ្លួនរួចរាល់សម្រាប់សកម្មភាព (តបត) មិនស្និទ្ធស្នាលពីសំណាក់ អាជ្ញាធររុស្ស៊ី ដូចជាការកាត់ផ្ដាច់ប្រទេសយើងពីប្រព័ន្ធ BRELL (បណ្ដាញអគ្គិសនី) ឬ រាល់វិធានការដទៃ» ប្រធានាធិបតីរបស់ ប្រទេសលីទុយអានី លោក Nauseda ថ្លែងដូច្នេះកាលពីថ្ងៃទី ២២ មិថុនា។
៣០ ឆ្នាំ បន្ទាប់ពីបានបំបែកខ្លួនចេញពី សហភាពសូវៀត និង ១៧ ឆ្នាំ ក្រោយពីបានចូលជាសមាជិក សហភាពអឺរ៉ុប (EU) ប្រទេសលីទុយអានី, ឡេតូនី និង អេស្តូនី នៅតែពឹងផ្អែកលើប្រភពផ្គត់ផ្គង់អគ្គិសនីពី ប្រទេសរុស្ស៊ី។
ក៏ប៉ុន្តែ លីទុយអានី កាលពីឆ្នាំកន្លង បានកែលម្អបណ្ដាញអគ្គិសនីរបស់ខ្លួន ដោយភ្ជាប់ជាមួយបណ្ដាញអគ្គិសនីរបស់ ប្រទេសប៉ូឡូញ ដែលជាសមាជិករបស់ សហភាពអឺរ៉ុប ក្នុងបំណងធានាដល់ការផ្គត់ផ្គង់អគ្គិសនីក្នុងករណីត្រូវបាន រុស្ស៊ី ផ្ដាច់ចរន្ត។
លីទុយអានី កាលពីសប្ដាហ៍កន្លង បានប្រកាសថា ចាប់ពីថ្ងៃទី ១៨ មិថុនា ប្រទេសនេះនឹងបិទផ្លូវដែកដែលភ្ជាប់ពី ទឹកដីរុស្ស៊ី ទៅកាន់ដែនដី Kaliningrad របស់ ទីក្រុងមូស្គូ។
ការបញ្ចេញមតិរបស់លោក Nauseda ត្រូវបានលើកឡើងបន្ទាប់ពី រុស្ស៊ី ស្នើ និងព្រមានឱ្យ លីទុយអានី ដកការរឹតត្បិតលើការដឹកជញ្ជូនទំនិញទៅតាមផ្លូវដែកខាងលើ បើមិនដូច្នោះទេ រុស្ស៊ី នឹងចាត់វិធានការឆ្លើយតប ដែល «មានផលប៉ះពាល់អាក្រក់ដល់ប្រជាជនលីទុយអានី»៕
