កាលពីថ្ងៃទី ២១ មិថុនា អគ្គិភ័យមួយបានកើតឡើងនៅក្នុងព្រៃនៃតំបន់ភាគនិរតីរបស់ ប្រទេសតួកគី ធ្វើឱ្យមានការព្រួយបារម្ភខ្លាំងចំពោះហានិភ័យដែលអាចដូចទៅនឹងភ្លើងឆេះព្រៃកាលពីឆ្នាំកន្លង ដែលបានបណ្ដាលឱ្យព្រៃ និងរុក្ខជាតិរាប់សិបហិកតាត្រូវបាត់បង់។
ភ្លើងឆេះព្រៃថ្មីនេះកើតឡើងនៅក្បែរតំបន់លម្ហែកាយនៅឆ្នេរសមុទ្រ Aegean របស់ស្រុក Marmaris ក្នុងខេត្ត Mugla។ ទីភ្នាក់ងារសារព័ត៌មានរដ្ឋ Anadolu រាយការណ៍ថា ភ្លើងព្រៃបានឆេះរាលដាលយ៉ាងរហ័សដោយសារតែមានខ្យល់ខ្លាំង ហើយកំពុងតែបន្តឆាបឆេះក្នុងទ្រង់ទ្រាយធំជាមួយនឹងល្បឿនយ៉ាងលឿន។ បច្ចុប្បន្ន ក្រុមមន្ត្រីជំនាញកំពុងតែស្រាវជ្រាវរកមូលហេតុនៃករណីភ្លើងឆេះព្រៃនេះ។
អ្នកវិទ្យាសាស្ត្ររបស់ សហភាពអឺរ៉ុប បានឱ្យដឹងថា ករណីភ្លើងឆេះព្រៃនៅរដូវក្ដៅកាលពីឆ្នាំកន្លងនៅ តួកគី គឺមានកម្រិតខ្ពស់បំផុត។ ចំណែកអ្នកវិទ្យាសាស្ត្រផ្សេងទៀតសង្កត់ធ្ងន់ថា បញ្ហាអាកាសធាតុប្រែប្រួលដែលបង្កឡើងដោយមនុស្ស កំពុងតែធ្វើឱ្យរលកកម្ដៅកើតឡើងញឹកញាប់ជាងមុន និងអាក្រក់ជាងមុន។
