អាជ្ញាធរកោះតៃវ៉ាន់ បាននិយាយថា យន្តហោះយោធារបស់ ចិន ចំនួន ២៩ គ្រឿង បានហោះចូលតំបន់កំណត់អត្តសញ្ញាណដែនអាកាសរបស់កោះនេះ ដែលនេះគឺជាការហោះចូលក្បែរដ៏ធំលើកទីបីក្នុងឆ្នាំ ២០២។
កងកម្លាំងការពារកោះតៃវ៉ាន់ ឱ្យដឹងថា យន្តហោះចម្បាំងចំនួន ១៧ គ្រឿង, យន្តហោះទម្លាក់គ្រាប់បែក ៦ គ្រឿង និងយន្តហោះគាំទ្រចំនួន ៦ គ្រឿងរបស់ ចិនដីគោក កាលពីម្សិលមិញ (២១ មិថុនា) បានហោះចូលតំបន់កំណត់អត្តសញ្ញាណការពារដែនអាកាស (ADIZ) របស់ តៃវ៉ាន់ បង្ខំឱ្យកងកម្លាំងរបស់កោះនេះ បញ្ចេញយន្តហោះចម្បាំងទៅបណ្ដេញ និងបើកប្រព័ន្ធការពារដែនអាកាសដើម្បីតាមដាន។
នេះគឺជាហោះការចូលមកកៀកដ៏ធំលើកទីបីក្នុងឆ្នាំ ២០២២ របស់ ទ័ពអាកាសចិន បន្ទាប់ពីករណីយន្តហោះ ៣៩ គ្រឿងបានចូលមកកាន់ ADIZ របស់ តៃវ៉ាន់ កាលពីថ្ងៃទី ២៣ មករា និងករណីយន្តហោះ ៣០ គ្រឿងកាលពីថ្ងៃទី ៣០ ឧសភា។
ករណីចូលមកក្នុងតំបន់ ADIZ របស់ តៃវ៉ាន់ ពីសំណាក់ ទ័ពអាកាសចិនដីគោក បានកើនឡើងយ៉ាងគំហុកក្នុងត្រីមាសទី ៤ ឆ្នាំ ២០២១ ក្នុងនោះ ករណីធំបំផុតគឺមានយន្តហោះចម្បាំងទំនើប ៥៦ គ្រឿង បានចូលមកកាន់តំបន់ ADIZ កាលពីថ្ងៃទី ៤ តុលា ២០២១។
ពេញមួយឆ្នាំ ២០២១ កោះតៃវ៉ាន់ បានរកឃើញថា យន្តហោះចម្បាំងរបស់ ចិនដីគោក បានចូលមកក្នុងតំបន់ ADIZ ចំនួន ៩៦០ លើក ច្រើនជាងទ្វេដង ធៀបនឹង ៣៨០ លើក ក្នុងឆ្នាំ ២០២០។
ប្រទេសចិន តែងចាត់ទុក កោះតៃវ៉ាន់ ជាខេត្តមួយរបស់ខ្លួនដែលរង់ចាំតែការបង្រួបបង្រួមប៉ុណ្ណោះ និងបានប្រកាសថា នឹងប្រើកម្លាំងបាយ បើសិនជាចាំបាច់៕