ប្រធានាធិបតីជាប់ឆ្នោតថ្មីរបស់ ប្រទេសហ្វ៊ីលីពីន ដែលមានការបារម្ភអំពីតម្លៃស្បៀងអាហារដែលចេះតែកើនឡើង បានប្រកាសថា នឹងកាន់តំណែងរដ្ឋមន្ត្រីក្រសួងកសិកម្ម ទន្ទឹមនឹងតំណែងប្រធានាធិបតី ដើម្បីទប់ទល់នឹងស្ថានការណ៍បន្ទាន់។
ប្រធានាធិបតីជាប់ឆ្នោតថ្មីរបស់ ហ្វ៊ីលីពីន លោក Ferdinand Marcos Jr. កាលពីថ្ងៃទី ២០ មិថុនា បានឱ្យដឹងថា នឹងកាន់កាប់តំណែងរដ្ឋមន្ត្រីក្រសួងកសិកម្មជាបណ្ដោះអាសន្ន និងកែទម្រង់ក្រសួងនេះឡើងវិញ ដើម្បីជំរុញការស្ដារសេដ្ឋកិច្ច ក្រោយពីកូវីដ-១៩ បានរាតត្បាតអស់រយៈពេល ២ ឆ្នាំ។ លោក Marcos Jr. នឹងកាន់តំណែងប្រធានាធិបតី និងរដ្ឋមន្ត្រី បន្ទាប់ពីពិធីស្បថចូលកាន់តំណែងនៅថ្ងៃទី ៣០ មិថុនាខាងមុខ។
«ខ្ញុំយល់ថា បញ្ហាមានសភាពធ្ងន់ធ្ងរគ្រប់គ្រាន់ ទើបសម្រេចចិត្តកាន់តំណែងរដ្ឋមន្ត្រីកសិកម្ម យ៉ាងហោចនៅក្នុងដំណាក់កាលនេះ» លោក Marcos Jr. ថ្លែងដូច្នេះ និងបន្ថែមថា លោកបានស្នើឱ្យទីប្រឹក្សាទាំងឡាយរបស់លោក ព្យាករអំពី «ស្ថានភាពបន្ទាន់ ពិសេសគឺទាក់ទិននឹងប្រភពផ្គត់ផ្គង់ស្បៀងអាហារ»។
ប្រធានាធិបតីជាប់ឆ្នោតថ្មីរបស់ ហ្វ៊ីលីពីន និយាយថា តម្លៃប្រេងកើនឡើងខ្ពស់ ប្រភពផ្គត់ផ្គង់អាហារក្នុងការចិញ្ចឹមសត្វត្រូវរអាក់រអួល អាចនាំឱ្យតម្លៃស្បៀងអាហារកើនឡើងខ្ពស់ជាងបច្ចុប្បន្ន។
លោក Marcos Jr. បានតែងតាំងសមាជិកគណៈរដ្ឋមន្ត្រីប្រហែល ២០ រូប ក្នុងនោះមានទាំងក្រុមប្រឹក្សាសេដ្ឋកិច្ច រដ្ឋមន្ត្រីក្រសួងការពារជាតិ និងទីប្រឹក្សាសន្តិសុខជាតិ ផងដែរ។