អាជ្ញាធរមូលដ្ឋានរបស់ ប្រទេសកុងហ្គោ បានបញ្ជាក់ថា មនុស្សជាង ៤០ នាក់បានស្លាប់នៅក្នុងករណីបាក់ស្រុតអណ្ដូងរ៉ែត្បូងពេជ្រនៅភាគកណ្ដាលប្រទេសនេះកាលពីថ្ងៃទី ៧ មិថុនា។
ប្រធានមន្ទីរមហាផ្ទៃនៃខេត្ត Kasai បានថ្លែងថា ករណីបាក់អណ្ដូងរ៉ែពេជ្រនៅក្នុងទីរួមស្រុក Samba ដែលដំបូងឡើងមានការបញ្ជាក់ថា មានមនុស្សជាង ៤០ នាក់បាត់បង់ជីវិតនោះ ពេលនេះបានរកឃើញសាកសពចំនួន ៦ នាក់ហើយ។
បច្ចុប្បន្ន ក្រុមមន្ត្រីមានសមត្ថកិច្ចក្នុងតំបន់កំពុងតែញាប់ដៃញាប់ជើងក្នុងការជួយសង្គ្រោះ។ ជនរងគ្រោះស្ទើរតែទាំងអស់គឺជាកម្មករជីករកត្បូងដោយដៃ ដែលធ្វើការក្នុងអណ្ដូងក្រោមដី។
