(អ៊ីរ៉ង់)-រថភ្លើងមួយខ្សែបានធ្លាក់ចេញពីផ្លូវដែក និងជ្រុលទៅបុកត្រាក់ទ័រមួយគ្រឿងដែលនៅក្បែរនោះ បណ្ដាលឱ្យមានមនុស្សស្លាប់យ៉ាងតិច ១៧ នាក់ និងរាប់សិបនាក់រងរបួស។
រថភ្លើងដឹកអ្នកដំណើរ ៣៤៨ នាក់ ជួបគ្រោះថ្នាក់ចរាចរណ៍កាលពីព្រឹកថ្ងៃទី ៨ មិថុនា នៅពេលកំពុងធ្វើដំណើរពីទីក្រុង Mashhad ភាគខាងជើងនៃ ប្រទេសអ៊ីរ៉ង់ ទៅកាន់ទីក្រុង Yazd ដែលនៅភាគកណ្ដាលប្រទេសនេះ។
អ្នកនាំពាក្យអង្គភាពសង្គ្រោះបន្ទាន់ Mojtaba Khaledi បានប្រាប់ទូរទស្សន៍រដ្ឋអ៊ីរ៉ង់ ថា «មនុស្ស ១៧ នាក់បានស្លាប់ និង ៣៧ នាក់ក្នុងចំណោមអ្នករងរបួស ៨៦ នាក់ ត្រូវចូលពេទ្យ។ ចំនួនអ្នកស្លាប់អាចកើនឡើង ដោយសារតែអ្នករងរបួសធ្ងន់ធ្ងរមានចំនួនច្រើន»។
Khaledi ឱ្យដឹងថា រថយន្តសង្គ្រោះបន្ទាន់ចំនួន ២៤ គ្រឿង និងឧទ្ធម្ភាគចក្រចំនួន ៣ គ្រឿង ត្រូវបានបញ្ជូនមកកាន់កន្លែងកើតហេតុ។
អ៊ីរ៉ង់ កាលពីឆ្នាំ ២០១៦ ក៏មានករណីគ្រោះថ្នាក់រថភ្លើងមួយកើតឡើង បន្ទាប់ពីរថភ្លើង ២ ខ្សែ បានបុកគ្នា និងឆាបឆេះនៅភាគខាងជើងប្រទេស បណ្ដាលឱ្យមនុស្ស ៤៤ នាក់ត្រូវបាត់បង់ជីវិត និងរាប់សិបនាក់រងរបួស ។ មេដឹកនាំស្ថាប័នគ្រប់គ្រងផ្លូវដែករបស់ អ៊ីរ៉ង់ ពេលនោះបានលាលែងពីតំណែង បន្ទាប់ពីបុគ្គលិក ៤ នាក់របស់លោកត្រូវបានចាប់ខ្លួន។