រដ្ឋមន្ត្រីក្រសួងធនធានធម្មជាតិ និងបរិស្ថាន របស់ សាធារណរដ្ឋដូមីនីក លោក Orlando Jorge Mera ត្រូវបានគេលួចបាញ់សម្លាប់ក្នុងការិយាល័យ ហើយជនសង្ស័យគឺត្រូវជាមិត្តជិតស្និទ្ធ។
ការិយាល័យប្រធានាធិបតីនៃ ប្រទេសដូមីនីក Luis Abinader កាលពីថ្ងៃទី ៦ មិថុនា បានឱ្យដឹងថា រដ្ឋមន្ត្រីក្រសួងធនធានធម្មជាតិ និងបរិស្ថាន Orlando Jorge Mera អាយុ ៥៥ ឆ្នាំ ត្រូវមិត្តជិតស្និទ្ធកាលពីនៅក្មេងឈ្មោះ Miguel Cruz បាញ់សម្លាប់នៅក្នុងការិយាល័យ។
បុគ្គលិកនៅក្រសួងខាងលើឱ្យដឹងថា ពួកគេបានឮសំឡេងគ្រាប់កាំភ្លើងផ្ទុះចំនួន ៧ គ្រាប់។ ភ្លាមៗបន្ទាប់នោះ សមត្ថកិច្ចក៏បានមកដល់កន្លែងកើតហេតុ និងបានដាក់បម្រាមគោចរនៅក្នុងអគារកើតហេតុ ជាទីដែលមានក្រសួងទេសចរណ៍ ផងដែរ។ ជនសង្ស័យឈ្មោះ Cruz ត្រូវបានគេជឿថា ត្រូវសមត្ថកិច្ចចាប់ខ្លួននៅក្នុងវិហារមួយនៅក្បែរនោះ។
លោក Orlando Jorge Mera អតីតមេធាវី និងជាសមាជិកនៃត្រកូលអ្នកនយោបាយដែលមានអំណាចខ្លាំងនៅ ប្រទេសកោះ ដូមីនីក។ លោកបានបង្កើតគណបក្សបដិវត្តន៍ទំនើប និងត្រូវបានជ្រើសតាំងជា រដ្ឋមន្ត្រីក្រសួងធនធានធម្មជាតិ និងបរិស្ថាន តាំងពីខែសីហា ២០២០។
ឪពុករបស់លោកគឺ Salvador Jorge Blanco ជាអតីតប្រធានាធិបតីរបស់ សាធារណរដ្ឋដូមីនីក ចាប់ពីឆ្នាំ ១៩៨២ ដល់ ១៩៨៦ ខណៈដែលប្អូនស្រីរបស់លោកគឺ Dilia Leticia ជា អនុរដ្ឋមន្ត្រីនៅក្នុងរដ្ឋាភិបាលរបស់ប្រធានាធិបតី Abinader។ កូនប្រុសរបស់លោក Orlando Jorge Mera ឈ្មោះ Orlando Jorge Villegas ក៏ជាសមាជិកបក្សបដិវត្តន៍ទំនើប។ ភរិយារបស់លោកឈ្មោះ Patricia Selma Villegas Garcia គឺជាឯកអគ្គរដ្ឋទូតរបស់ សាធារណរដ្ឋដូមីនីក ប្រចាំ ប្រទេសប្រេស៊ីល។