នៅមុន ប្រទេសតួកគី (Turkey) មានប្រទេសមួយចំនួនក៏ធ្លាប់បានប្ដូរឈ្មោះប្រទេស ដោយមូលហេតុអាចបណ្ដាលមកពី កត្តានយោបាយ ប្រវត្តិសាស្ត្រ ហើយក៏មានករណីខ្លះគឺដើម្បីឃោសនាកេរ្តិ៍ឈ្មោះប្រទេសជាតិផងដែរ។
កាលពីថ្ងៃទី ២ មិថុនា អង្គការសហប្រជាជាតិ (UN) ប្រកាសថា ឈ្មោះ « Türkiye» នឹងត្រូវបានហៅជំនួសឈ្មោះ «Turkey»។
«Türkiye គឺជាឈ្មោះល្អបំផុតសម្រាប់វប្បធម៌ និងតម្លៃរបស់ ជនជាតិតួកគី» ប្រធានាធិបតី Recep Tayyip Erdogan ថ្លែងដូច្នេះកាលពីខែធ្នូ ២០២១ នៅពេលរដ្ឋាភិបាលប្រកាសអំពីការប្ដូរឈ្មោះប្រទេស។
ឈ្មោះ Türkiye ត្រូវបានប្រើប្រាស់នៅ តួកគី ក្នុងឆ្នាំ ១៩២៣ នៅពេលដែលដែនដីនេះក្លាយជាប្រទេសថ្មីបន្ទាប់ពី ចក្រភពអូតូម៉ង់ (Ottoman) បានដួលរលំ។ ប៉ុន្តែ តួកគី បានប្រើប្រាស់ឈ្មោះ Turkey នៅលើឆាកអន្តរជាតិ។ Türkiye និង Turkey មានសំឡេងស្រដៀងគ្នា ដោយ Türkiye មានថែមសំឡេង «yay» នៅខាងចុង។
ហូឡង់ (Netherlands)
រដ្ឋាភិបាលហូឡង់ (Netherlands) ក៏ធ្លាប់បានប្ដូរឈ្មោះពី Holland ផងដែរ។ មកដល់ឆ្នាំ ២០២០ ក្រុមមេដឹកនាំក្រុមហ៊ុន គណៈកម្មការទេសចរណ៍ និងរដ្ឋាភិបាលកណ្ដាលរបស់ ហូឡង់ សុទ្ធតែប្រើប្រាស់ឈ្មោះ Netherlands។
បច្ចុប្បន្ន ហូឡង់ខាងជើង និង ហូឡង់ខាងត្បូង គ្រាន់តែជា ២ ក្នុងចំណោមខេត្តចំនួន ១២ របស់ ប្រទេសហូឡង់ (Netherlands) ប៉ុណ្ណោះ។
ការប្ដូរឈ្មោះនេះគឺក្នុងបំណងចាកផុតពីទំនាក់ទំនងនៃប្រទេសនេះជាមួយនឹងការប្រើប្រាស់គ្រឿងញៀនជាការកម្សាន្ត និងពេស្យាចារស្របច្បាប់។
ម៉ាសេដ្វានខាងជើង (North Macedonia)
ឆ្នាំ ២០១៩ សាធារណរដ្ឋម៉ាសេដ្វាន ត្រូវបានប្ដូរឈ្មោះជាផ្លូវការទៅជា ម៉ាសេដ្វានខាងជើង ដោយសារបញ្ហានយោបាយជាមួយនឹង ប្រទេសក្រិក។ ប៉ុន្តែ ឈ្មោះសម្រាប់ហៅភាសាផ្លូវការ និងពលរដ្ឋ នៅតែជា ម៉ាសេដ្វាន។
រាជាណាចក្រស្វាស៊ីឡង់ (Swaziland) បច្ចុប្បន្នគឺ រាជាណាចក្រអេស្វាទីនី (Eswatini)
កាលពីខែមេសា ២០១៨ មហាក្សត្រ Mswati ទីបី បានប្ដូរឈ្មោះប្រទេសពី ស្វាស៊ីឡង់ ទៅជា អេស្វាទីនី ដើម្បីរួចផុតពីអតីតកាលដែលជាប្រទេសស្ថិតក្នុងអាណានិគម ប្រទេសស្វាស៊ីឡង់។
សាធារណរដ្ឋឆែក (Czechia/Czech Republic)
មូលហេតុនៃការប្ដូរឈ្មោះរបស់ សាធារណរដ្ឋឆែក គឺដើម្បីឃោសនាកិត្តិនាមប្រទេសជាតិ។ ឆ្នាំ ២០១៦ រដ្ឋាភិបាលឆែក សម្រេចប្រើប្រាស់ឈ្មោះ Czechia ជាផ្លូវការ។ ដូចទៅនឹង សាធារណរដ្ឋបារាំង សាធារណរដ្ឋឆែក ក៏អាចត្រូវបានគេហៅថា Czechia ដែលអានថា ឆែកៀ។
កាប់វែរ (Cabo Verde)
ប្រទេសកោះមួយនេះបានដាក់សំណើប្ដូរឈ្មោះប្រទេសជាផ្លូវការកាលពីឆ្នាំ ២០១៣។ មុននោះ Cabo Verde
ត្រូវបានគេហៅថា Cape Verde។ មូលហេតុនៃការប្ដូរឈ្មោះនេះគឺគេសង្ឃឹមថា Cabo Verde នឹងនាំមកនូវការស្រមៃវិជ្ជមានចំពោះព្រះអាទិត្យ សមុទ្រ និងមនុស្ស ប្រកបដោយសុភមង្គល។
ស្រីលង្កា (Sri Lanka)
ដូចទៅនឹង អេស្វាទីនី (Eswatini) ប្រទេសស្រីលង្កា (សាធារណរដ្ឋសង្គមនិយមប្រជាធិបតេយ្យស្រីលង្កា) ប្ដូរឈ្មោះក៏ព្រោះតែចង់ចាកផុតពីអតីតកាលដែលជាទឹកដីអាណានិគមរបស់បរទេស។ បើទោះជាការប្ដូរឈ្មោះត្រូវបានធ្វើឡើងតាំងតែពីឆ្នាំ ១៩៧២ ក្រោយពីដណ្ដើមបានឯករាជ្យពី អង់គ្លេស ប៉ុន្តែ រហូតដល់ឆ្នាំ ២០១១ ទើប ស្រីលង្កា សម្រេចលុបឈ្មោះ Ceylon (ស៊ីឡុង) ចេញពីរដ្ឋាភិបាល។