តំណាងរាស្ត្រសភាជាន់ខ្ពស់ Klintsevich និយាយថា រុស្ស៊ី គួរតែកម្ទេចមូលដ្ឋានទ័ពអាម៉េរិក បន្ទាប់ពីប្រទេសនេះប្រកាសផ្ដល់កាំជ្រួចហ្វូងប្រតិកម្មរហ័ស HIMARS ឱ្យ អ៊ុយក្រែន។
ក្នុងវីដេអូដែលដកស្រង់ពីកម្មវិធីទូរទស្សន៍របស់ រុស្ស៊ី បង្ហោះលើបណ្ដាញសង្គមកាលពីថ្ងៃទី ២ មិថុនា តំណាងរាស្ត្រសភាជាន់ខ្ពស់ Frant Klintsevich និយាយថា «ដល់ពេលដែលយើងត្រូវបញ្ចេញសកម្មភាពដើម្បីព្រមានចំពោះពួកគេ ទាក់ទិននឹងការផ្ដល់ប្រព័ន្ធដូចនេះ» ចង់សំដៅលើប្រព័ន្ធកាំជ្រួចហ្វូង M១៤២ (HIMARS) ដែល សហរដ្ឋអាម៉េរិក ប្រកាសថានឹងបញ្ជូនទៅឱ្យ អ៊ុយក្រែន។
យោងតាមលោក Frant Klintsevich រុស្ស៊ី ត្រូវការប្រើប្រាស់អាវុធរយៈចម្ងាយឆ្ងាយ និងបាញ់ចាំគោលដៅកម្រិតខ្ពស់ ដើម្បីវាយប្រហារលើទីតាំងប្រគល់ និងទទួលអាវុធ ដើម្បីជាការព្រមាន។ «ដល់ពេលដែលត្រូវកម្ទេចបណ្ដាមូលដ្ឋានទ័ពអាម៉េរិក នៅ អឺរ៉ុប» លោក Frant Klintsevich និយាយដូច្នេះ និងបន្ថែមថា «នេះគឺជាយោបល់ផ្ទាល់ខ្លួនរបស់ខ្ញុំ។ រុស្ស៊ី ត្រូវការធ្វើដូច្នេះ បើសិនជាមិនមានអ្នកណាស្ដាប់យើង ហើយជនជាតិរុស្ស៊ី ត្រូវបានគំរាមកំហែងនៅលើទឹកដីរបស់ខ្លួន»។
លោក Frant Klintsevich ឱ្យដឹងថា សូវៀត ធ្លាប់បានបាញ់ទម្លាក់យន្តហោះអាម៉េរិក រហូតដល់ ១,២៧០ គ្រឿងនៅក្នុងសង្គ្រាមកូរ៉េ ពីឆ្នាំ ១៩៥០ ដល់ ១៩៥៣ បើទោះជាពេលនោះប្រទេសទាំងពីរមិនមានសង្គ្រាមនឹងគ្នា។
ការលើកឡើងរបស់លោក Frant Klintsevich ត្រូវបានធ្វើឡើងបន្ទាប់ពី អាម៉េរិក ប្រកាសថា នឹងដឹកកាំជ្រួចហ្វូង HIMARS ដែលបាញ់បានចម្ងាយ ៨០ គីឡូម៉ែត្រ ទៅឱ្យ អ៊ុយក្រែន។ កាលពីថ្ងៃទី ២ មិថុនា ទីក្រុងកៀវ បានសន្យាថា នឹងមិនប្រើប្រាស់អាវុធនេះដើម្បីវាយប្រហារលើគោលដៅក្នុងទឹកដីរបស់ រុស្ស៊ី ឡើយ។
ចំណែក រុស្ស៊ី វិញ កន្លងមកក៏ធ្លាប់អះអាងថា ការដែលបស្ចិមលោកផ្ដល់អាវុធធុនធ្ងន់ឱ្យ អ៊ុយក្រែន នឹងធ្វើឱ្យសង្គ្រាមអូសបន្លាយកាន់តែយូរ។
សហរដ្ឋអាម៉េរិក រក្សាកម្លាំងរបស់ខ្លួនយ៉ាងច្រើននៅ អឺរ៉ុប ក្នុងនោះមានមូលដ្ឋានទ័ពចំនួន ១១៩ កន្លែងនៅ អាល្លឺម៉ង់ (គិតត្រឹមឆ្នាំ ២០២១)។ មូលដ្ឋានទ័ពអាម៉េរិក ដែលធំជាងគេបង្អស់នៅ អាល្លឺម៉ង់ គឺ មូលដ្ឋានទ័ពអាកាស Ramstein ដោយមានទំហំ ១២ គីឡូម៉ែត្រក្រឡា។
ប្រទេសជាច្រើននៅ អឺរ៉ុប ដែល អាម៉េរិក ដាក់មូលដ្ឋានទ័ព គឺជាសមាជិក អង្គការណាតូ។ បើសិនជា រុស្ស៊ី វាយប្រហារលើ មូលដ្ឋានទ័ពអាម៉េរិក នៅ អឺរ៉ុប នោះមានន័យថា ណាតូ មានហេតុផលគ្រប់គ្រាន់ដើម្បីប្រើប្រាស់មាត្រានៃកិច្ចព្រមព្រៀងការពារគ្នារបស់សម្ព័ន្ធយោធានេះ។