ប្រធានាធិបតីហ្វ៊ីលីពីន Rodrigo Duterte ទើបតែបានបង្ហើបឱ្យដឹងអំពីគម្រោងការងារដែលលោកនឹងធ្វើបន្ទាប់ពីចប់អាណត្តិប្រធានាធិបតី។ លោក Duterte នឹងធ្វើជាគ្រូបង្រៀននៅវិទ្យាស្ថានប៉ូលិសក្នុងទីក្រុង Davao ដែលជាស្រុកកំណើតរបស់លោក។
ព័ត៌មាននេះ កន្លងមកធ្លាប់ត្រូវបានលើកឡើងដោយជំនួយការប្រធានាធិបតី ប៉ុន្តែមិនទាន់និយាយច្បាស់ថា លោក Duterte នឹងបង្រៀនមុខវិជ្ជាអ្វី និងនៅទីណា។ នៅក្នុងជំនួបជាមួយក្រុមអត្តពលិកហ្វ៊ីលីពីន ដែលបានចូលរួមប្រកួតក្នុងព្រឹត្តិការណ៍ SEA Games លើកទី ៣១ នៅ វៀតណាម ប្រធានាធិបតី Duterte ថ្លែងថា «ខ្ញុំនឹងវិលត្រលប់ទៅរកការងារជាគ្រូបង្រៀន។ ខ្ញុំធ្លាប់ជាសាស្ត្រាចារ្យក្រៅម៉ោងនៅ វិទ្យាស្ថានប៉ូលិសមួយ នៅទីក្រុង Davao។ ខ្ញុំកំពុងរៀបគម្រោងវិលទៅរកការងារនេះ នៅពេលចប់អាណត្តិប្រធានាធិបតី ដើម្បីបង្រៀនមុខវិជ្ជាច្បាប់ព្រហ្មទណ្ឌ និងរឿងក្ដីព្រហ្មទណ្ឌ»។
លោក Duterte ធ្លាប់ជារដ្ឋអាជ្ញាតុលាការនៅ Davao មុនពេលឈានជើងចូលវិស័យនយោបាយក្នុងនាមជាអភិបាលរងក្រុង។
អាណត្តិប្រធានាធិបតីហ្វ៊ីលីពីន របស់ លោក Duterte នឹងត្រូវចប់នៅថ្ងៃទី ៣០ មិថុនាខាងមុខ។ ប្រធានាធិបតីជាប់ឆ្នោតបន្តគឺ Ferdinand Marcos Jr ក៏នឹងត្រូវឡើងកាន់តំណែងនេះនៅក្នុងថ្ងៃជាមួយគ្នានេះដែរ។