សហរដ្ឋអាម៉េរិក នឹងដឹកជញ្ជូនឱ្យ អ៊ុយក្រែន នូវប្រព័ន្ធបាញ់មីស៊ីលទំនើប និងមីស៊ីល Javelin ចំនួន ១,០០០ គ្រាប់ នៅក្នុងកិច្ចប្រឹងប្រែងថ្មីបំផុតក្នុងការបំពាក់អាវុធដល់ ទាហានអ៊ុយក្រែន ដើម្បីទប់ទល់នឹង រុស្ស៊ី។
យោងតាម CNBC សហរដ្ឋអាម៉េរិក បានឱ្យដឹងថា កញ្ចប់ជំនួយថ្មីខាងលើនេះមានតម្លៃ ៧០០ លានដុល្លារអាម៉េរិក។ នេះគឺជាកញ្ចប់ជំនួយទី ១១ ដែល សហរដ្ឋអាម៉េរិក ផ្ដល់ឱ្យ អ៊ុយក្រែន និងជាខ្ទង់ជំនួយដំបូងនៃកញ្ចប់ជំនួយតម្លៃប្រហែល ៤០ ពាន់លានដុល្លារ ដែល សភាអាម៉េរិក បានបែងចែកឱ្យ អ៊ុយក្រែន កាលពីខែឧសភាកន្លងទៅ។
កញ្ចប់ជំនួយជាអាវុធថ្មីនេះរួមមាន៖ ប្រព័ន្ធបាញ់កាំជ្រួចហ្វូង HIMARS ចំនួន ៤ និងគ្រាប់រំសេវ, រ៉ាដាប្រឆាំងកាំភ្លើងធំ ២ គ្រឿង, រាដាគ្រប់គ្រងដែនអាកាស ២ គ្រឿង, មីស៊ីល Javelin ១,០០០ គ្រាប់ និងទម្រ ៥០ គ្រឿង, អាវុធប្រឆាំងរថក្រោះ ៦,០០០ គ្រាប់, គ្រាប់កាំភ្លើងធំ ១៥៥ មម ១៥,០០០ គ្រាប់, ឧទ្ធម្ភាគចក្រ Mi-១៧ ៤ គ្រឿង, យានយោធាយុទ្ធសាស្ត្រ ១៥ គ្រឿង រួមនឹងឧបករណ៍ និងគ្រឿងបន្លាស់ជាច្រើនទៀត។
អ្នកនាំពាក្យរបស់ មន្ទីរបញ្ចកោណ Todd Breasseale ឱ្យដឹងថា កញ្ចប់ជំនួយថ្មីនេះបានជួយឱ្យជំនួយសរុបដែលរដ្ឋាភិបាលរបស់លោក បៃដិន ផ្ដល់ឱ្យ អ៊ុយក្រែន ឡើងដល់ប្រមាណ ៤.៦ ពាន់លានដុល្លារ រាប់ចាប់តាំងពី រុស្ស៊ី បានបើកយុទ្ធនាការយោធានៅ អ៊ុយក្រែន កាលពីថ្ងៃទី ២៤ កុម្ភៈ ២០២២។